“Beşiktaş”ın Bakıda “Sabah”la keçirəcəyi xeyriyyə oyununun vaxtı hələ də dəqiqləşməyib.

"Football-plus.az" xəbər verir ki, İstanbul təmsilçisinin baş məşqçisi Şenol Günəş matçın martın 21-i və ya 24-də baş tuta biləcəyini söyləmişdi. Lakin bakılılar üçün uyğun vaxt martın 25-i idi. Bir müddət sonra qarşılaşmanın aprelə təxirə salındığı haqda məlumat yayıldı. “Sabah”ın baş məşqçisi Murad Musayev də yoldaşlıq oyununun növbəti ayın sonunda keçirilmək ehtimalını təsdiqlədi. Bu dəfə isə “Beşiktaş”ın prezidenti Ahmet Nur Çəbinin xüsusi məsləhətçisi Ərdal Cömərt Türkiyə superliqasındakı sıxlıq səbəbindən oyunun növbəti dəfə ertələndiyini açıqladı.

Bununla yanaşı, matçın hansı stadionda keçiriləcəyi də rəsmən açıqlanmayıb. Redaksiyamıza daxil olan məlumata görə, “Sabah” rəhbərliyinin bu istiqamətdə iki variantı var. Belə ki, xeyriyyə oyunu ya Tofiq Bəhramov adına Respublika stadionunda, ya da Bakı Olimpiya Stadionunda keçiriləcək.

KƏNAN BAHADIR