“Qalatasaray”ın ardından “Beşiktaş”ın da paytaxtımıza gələrək dostluq və xeyriyyə oyunu keçirməsi məsələsi muzakirə olunduğu bir vaxtda maraqlı bir xəbər ortaya çıxıb. Xatırladaq ki, martın 26-da “Qalatasaray” “Bakı Olimpiya Stadionunda “Qarabağ”la qarşılaşmış və 2:1 hesabı ilə qalib gəlmişdi. Böyük ajiotaj doğuran bu xeyriyyə oyununda 1 milyon manatdan çox pul yığılmışdı. Bu məbləğ Türkiyədə zəlzələdən zərər görmüş insanlara göndəriləcək.

“Beşiktaş”ın isə paytaxtımıza gələrək “Sabah”la qarşılaşmaq ehtimalı var. Hər halda, bu variantla bağlı danışıqlar gedir. Bu arada məlum olub ki, “Beşiktaş” İspaniya nəhəngi ilə xeyriyyə oyunu keçirməklə bağlı anlaşma əldə edib!

"Football-plus.az"ın məlumatına görə, söhbət Dieqo Simeonenin çalışdırdığı Madrid “Atletiko”sundan gedir. Oyun “Together for Turkey” (Türkiyə üçün birlikdə) şüarı altında keçiriləcək və xeyriyyə məqsədi daşıyacaq. Matçın bütün gəlirləri zəlzələdən zərər görmüş insanlara göndəriləcək. Türkiyə mətbuatının yazdığına inansaq, xeyriyyə məqsədli oyun keçirmək təklifi qarşı tərəfdən, yəni ispanlardan gəlib. Deyilənə görə, bir müddət öncə “Atletiko”nun icraçı direktoru Xesus Anxel Xil Marin “Doğuş” şirkətinin idarə heyətinin sədri Fərid Şahənkə zəng vuraraq zəlzələ ilə bağlı başsağlığını dilə gətirib və “Türkiyə xalqına necə yardım edə bilərik” sualını verib. Məhz bu ikili arasındakı söhbət əsnasında “Beşiktaş”la “Atletiko” arasında xeyriyyə oyununun keçirilməsi ilə bağlı razılıq əldə olunub. Beləliklə, görüş aprelin 12-də “Qartal”ın ev oyunlarını keçirdiyi “Vodafon Park”da baş tutacaq. Bakı vaxtı ilə saat 21.00-da başlayacaq oyun NTV və “Star” kanalları ilə canlı yayınlanacaq.

“Beşiktaş”dan söz düşmüşkən, onu da bildirək ki, Dele Alli zədəsini sağaltmaq üçün növbəti dəfə vətəni İngiltərəyə yollanıb. Mövsümün əvvəlində “Everton”dan birilliyə icarəyə götürülən və heç cür ümidləri doğrulda bilməyən futbolçu Valerien İsmaelin dönəmində az-çox oynamaq şansı qazanırdısa, Şenol Günəşin təyinatından sonra, demək olar, meydana çıxmır. 26 yaşlı futbolçu bu mövsüm 17 rəsmi oyunda 869 dəqiqə meydanda olub və cəmi 3 qol vurub. Əzələsində yırtıq olan Alli rəhbərliyin və Günəşin icazəsi ilə İngiltərəyə yollanıb. Qeyd edək ki, ötən ay da Alli vətəninə yollanmışdı. Amma dediyi vaxtdan 1 gün gec qayıtdığı üçün Günəş onu üstüörtülü şəkildə tənqid etmişdi. “Beşiktaş”ın bu futbolçunu mövsümün sonunda daimi əsasda transfer etməyəcəyi gün kimi aydındı. Ona görə də tərəflərin hətta mövsüm başa çatmadan da yollarını ayıracağı istisna olunmur.