''Beşiktaş''lı Rıdvan Yılmazın ''Ayntraxt''a keçidində maneə yaranıb.

Əslində Frankfurt təmsilçisi hələ iyunun 11-də həm futbolçunun özü, həm də İstanbul nəhəngi ilə ilkin razılıq əldə etmişdi. İstedadlı sol cinah müdafiəçisinin AL-in son qalibi ilə beşillik müqavilə imzalayacağı gözlənilirdi. Amma aradan 3 həftəyə yaxın müddətin ötməsinə baxmayaraq, transferin hələ də rəsmi şəkildə açıqlanmaması şübhələrə yol açıb. Başqan Ahmet Nur Çəbi bir neçə gün öncə verdiyi açıqlamada bu satışdan ümumilikdə 6,5 milyon avro qazanacaqlarını demişdi. Bu məbləğin 4 milyon avrosu dərhal, qalan 2,5 milyon avrosu isə hissə-hissə ''Beşiktaş''a ödəniləcəkdi. Amma məlum olub ki, ''Ayntraxt'' heç 4 milyon avronu da nəğd ödəmək istəmir!

''Qartal'' bu məbləğin heç olmasa, böyük hissəsini tələb etsə də, qarşı tərəf məsələni uzadır. Almanlar 4 milyon avronu da hissə-hissə ödəməyi təklif ediblər. Bu üzdən danışıqlar prosesində ciddi əngəl yaranıb. Tərəflər ortaq məxrəcə gələ bilməsə, keçid baş tutmayacaq. Bu halda 21 yaşlı futbolçu ''Beşiktaş''da qalacaq və yeni müqaviləyə imza atmasa, gələn yay sərbəst oyunçuya çevriləcək. Çünki onun klubla müqaviləsinin müddəti 2023-ə qədərdi.

Digər tərəfdən Rıdvana ciddi maraq göstərən ''Torino'' vəziyyəti yaxından izləyir. ''Beşiktaş''la ''Ayntraxt'' anlaşa bilməsə, italiyalıların dərhal araya girəcəyi istisna olunmur. Türkiyə mətbuatının yazdığına inansaq, Turin klubu maddi cəhətdən ''Beşiktaş''ın tələbini yerinə yetirməyə hazırdı.