Küveytdə uğursuz legioner həyatı yaşayandan sonra vətənə dönən Kamal Mirzəyevin başı üzərindən qara buludlar əskik olmur.

Yenidən sabiq komandası "Qəbələ"yə keçən futbolçu burda da uğursuzluqla üzləşərək az şans qazandı. Cari mövsüm "Şamaxı"ya transfer olunan 28 yaşlı oyunçunun yeni komandasında tez-tez şans qazanmasına isə zədələr mane oldu. Kamalla komandasının 32-ci turda "Sabah"a minimal hesabla uduzduğu qarşılaşmadan sonra söhbətləşdik. Onun legioner həyatının qısa çəkməsi, mövsümün sonunda bölgə təmsilçisinin sıralarını tərk edib-etməyəcəyi və başqa mövzular ilə bağlı səsləndirdiyi fikirləri diqqətinizə çatdırırıq.

- "Sabah"la çətin oyun keçirdiz. Bərabərlik qolunu vura bilməyiniz üçün nə çatmadı?
- Ciddi hazırlaşmışdıq. Məqsədimiz səfərdən xalla ayrılmaq idi. Rəqib avrokuboka vəsiqəni təmin edən və hazırda da ikinci pillədə qərarlaşan komandadı. Buna rəğmən, Masazır təmsilçisindən çəkinmədik. Hətta deyərdim ki, başabaş oyun getdi. İkinci yarıda qol vurmaq üçün irəli atılsaq da, fərdi ustalıqda rəqibə uduzmağımız minimalhesablı məğlubiyyətlə nəticələndi.

- Bu mövsüm olduqca az şans qazanmağının səbəbi nədi?
- Qışa qədər az-çox şans qazandım. Sonra zədələnib sıradan çıxdım. Hazırda zədəmi sağaltmışam, nə vaxt şans verilsə, meydana çıxıb əlimdən gələni edəcəm. Məşqçilər korpusunun qərarına da hörmət edirəm.

- Legioner həyatın qısa çəkdi. Səbəb nə idi?
- Küveyt təmsilçisi "Əl-Salmiya"ya böyük ümidlərlə transfer olunmuşdum. Hər şey qaydasında gedirdi. Orda çıxış edərkən belimdən zədə aldım. Sonra aşkarlandı ki, belimdə 8 mm-dən böyük yırtıq var. Zədəmi sağaltdığım vaxt ortaya pandemiyaya düşdü. Küveytdə karantin şərtləri bizdəkindən də ağır idi. Hər şey onlayn rejimə keçirilmişdi, evdən bayıra çıxmağa icazə yox idi. Bununla yanaşı, çempionatın nə vaxt bərpa olunacağı da bəlli deyildi. Belə olduğuna görə də vətənə qayıtdım.

- Küveytdən qayıdandan sonra sabiq komandan "Qəbələ"yə keçdin. Amma orda da az şans qazandın...
- "Qırmızı-qaralar"a qayıdışım zamanı belimdəki zədəni hələ tam sağaltmamışdım. Buna rəğmən, klub rəhbərliyi və məşqçilər korpusu yenidən məni heyətə qatıb, şans verdi. Buna görə onlara təşəkkürümü bildirirəm. Həm müalicəmi davam etdirməyimə, həm bərpa prosesinin vaxt aparmasına, həm də rəqabətə davam gətirə bilmədiyimə görə mövsümün sonunda "Qəbələ"dən ayrılıb "Şamaxı"ya keçdim. Burda da dediyim kimi, ardıcıl zədələr çox şans qazanmağıma mane oldu.

- Yayda "Şamaxı"nı tərk etməyi düşünürsən?
- Hələ çempionatın sonuna var. Hazırda komandamızın daha yüksək pillələrdə qərarlaşmasına çalışırıq, buna fokuslanmışıq. Mövsümün sonunda taleyimə aydınlıq gələcək.

- "Şamaxı" birinci diviziona yuvarlansa, komandada qalacaqsan?
- Klub rəhbərliyi, məşqçilər korpusu və futbolçular birinci diviziona düşmək barədə düşünmür. Hamılıqla qarşıdakı oyunlarda maksimum nəticə göstərib sonuncu olmamağı düşünürük. Yalnız mövsüm yekunlaşandan sonra karyeramı hansı komandada davam etdirəcəyimlə bağlı danışmaq olar.

- Sabiq komandan "Qəbələ" iki “cəbhə”də uğurla döyüşür - həm kubokun finalına vəsiqəni təmin edib, həm də 4-cü yeri heç kimə güzəştə getməməyə çalışır. "Qırmızı-qaralar"ın çıxışı barədə nə deyə bilərsən?
- "Qəbələ"nin uğurları məni çox sevindirir. O klub mənim üçün doğmadı. “Qəbələ” akademiyasında yetişmişəm. İnanıram ki, uğurların davamı gələcək.

- Necə düşünürsən, "Qəbələ" kubokun həlledici oyununda "Neftçi"ni üstələyə biləcək?
- Hər iki finalçı Azərbaycan futbolunda sözünü demiş klubdu. Ona görə də kimin daha şanslı olduğunu indidən demək düz olmaz. Amma "Qəbələ"yə azarkeşlik edəcəyimə əmin ola bilərsiz.

ABDULLA İSMAYILOĞLU