"Birinci dövrə lider komandaları üzə çıxardı. "Qarabağ", "Sabah" və "Neftçi" böyük ölçüdə ilk "3-lük"də mübarizə aparacaq. Təbii ki, "Qarabağ"ın çempionluq şansı daha çoxdu. "Zirə" ilə "Qəbələ"ni də hesabdan silmək olmaz. Bu komandalar ilk 3 yer olmasa da, avrokuboka vəsiqə uğrunda döyüşəcək. Düşünürəm ki, ilk "5-lik"də olacaqlar. Ola bilər, çempionatın gedişində hansısa biri 3-4-cü yerdə qərarlaşsın. "Səbail", "Turan Tovuz" və "Sumqayıt"ın avrokuboklar uğrunda mübarizə aparacağını desək, yalan olar. Bu komandalar orta yerlər uğrunda döyüşəcək. "Kəpəz"lə "Şamaxı" isə daha çox sonuncu olmamağa çalışacaq. İstənilən halda, heç bir klub çempionatı turnir cədvəlinin dibində bitirmək istəməz. Hələ bilmirik, mövsümün sonunda nə qərar veriləcək. Yəni, sonuncu yeri tutan elitanı tərk edəcək, ya yox. Son pillədə qərarlaşan komandanın 1-ci diviziona yuvarlanacağı dəqiqləşsə, düşünürəm ki, daha gərgin mübarizə gedəcək. İstənilən halda, qarşıda hələ 2-ci dövrə və fasilə var. Komandaların qış “transfer pəncərəsi”ndə heyəti gücləndirməsindən, təlim-məşq toplanışlarından da çox şey asılı olacaq".