Mövsüm bitəndən sonra heyətində böyük dəyişikliklər edən komandalardan biri də "Şamaxı"dı.

Əvvəlcə təcrübəli futbolçular və legionerlərlə yollar ayrıldı, sonra isə komandaya baş məşqçi təyin edilən Rüstəm Əliyevin əvəzinə Cavid Hüseynov gətirildi. Amma "yarpaq tökümü"nə baxmayaraq, 29 yaşlı Amil Yunanov düşərgəni tərk etmədi və qarşıdakı bir il ərzində "qırmızı-ağlar"ın formasını geyəcək. Futbolçu ilə bu mövzu ətrafında söhbət etdik.

- Amil, necə oldu ki, növbəti mövsümdən heç bir iddiası olmayan "Şamaxı"da qalmaq qərarına gəldin?

- Bildiyiniz kimi, "Şamaxı"dan gedənlər çox oldu. Mənim də başqa təkliflərim vardı. Əsas da "Turan Tovuz"a keçməyə çox yaxın idim. Bölgə təmsilçisiylə, demək olar ki, razılığa gəlmişdik, yalnız müqaviləyə qol çəkmək qalırdı. İş elə gətirdi ki, "Şamaxı"da qalmağı üstün tutdum.

- "Turan Tovuz"da hansı şərtlər səni qane etmədi?

- Deməzdim ki, şərtlər qane etmədi. Sadəcə, sonda "Şamaxı"da qalmaq qərarı verdim. Bunda Cavid Hüseynovun baş məşqçi təyin olunması da rol oynadı. O, məni komadada görmək istədiyini bildirdi, söhbət etdik, razılığa gəldik.

- "Turan Tovuz" "Şamaxı" ilə müqayisədə daha güclü heyətə malikdi. Bu baxımdan karyerana zərbə vurduğunu düşünmürsən?

- Belə düşünmürəm. Zatən, "Turan Tovuz" yeni formalaşan komandadı. Odu ki, bölgə təmsilçisinin çempionluq və ya avrokuboklara vəsiqə uğrunda mübarizə aparmayacağı dəqiqdi. Eynilə "Şamaxı" da yenidən formalaşan komandadı, xeyli vaxtdı burdayam, heyətdəki oyunçularla anlaşma da yaxşıdı. Onsuz da komanda yenidən formalaşırsa, ya köhnə, ya yeni komandada oynamağın ciddi fərqi yoxdu. Hər halda, "Şamaxı"da uyğunlaşma və başqa problemlərin olacağını düşünmürəm. Burda daha çox şans qazanıb formamı bərpa edəcəyimə inanıram.

- Legioner həyatı yaşaya bilməzdin?

- Təbii ki, hər bir futbolçu karyerası ərzində legioner həyatı yaşamaq istəyər. Ölkə xaricinə üz tutursansa, gərək daha yaxşı formada olasan, özünü orda inkişaf etdirəsən. Ötən mövsüm "Şamaxı"da az şans qazandım. Ona görə legioner həyatı yaşamağa özümü hazır saymıram. Həmçinin öz çempionatımızdan səviyyəcə aşağı liqalarda, klublarda oynamaqdansa, burda çıxış etmək daha yaxşıdı.

- Bu vaxta kimi bir çox məşqçilərin rəhbərliyi altında çıxış etmisən. Cavid Hüseynovun onlardan fərqli cəhəti nədi?

- Cavid müəllimlə futbolçu kimi tez-tez rəqib olmuşuq. Yaxın yoldaşlığımız da olub. Yəni bir-birimizi yaxşı tanıyırq. Cavid müəllim məşqçilikdə yeni olsa da, enerjili, iddialı və futbolçularla ünsiyyət qurmağı yaxşı bacarır. Sadaladıqlarım baş məşqçi üçün lazımlı xüsusiyyətlərdi. Düşünürəm ki, Cavid Hüseynovun rəhbərliyi altında yenidən formalaşan "Şamaxı" oyunu ilə azarkeşlərin rəğbətini qazanacaq.

- Heyətiniz əsasən gənc futbolçulardan qurulub. Bu, qarşıdakı mövsümdə autsayder olmağınızı şərtləndirməyəcək?

- Bəli, heyətin əsasını əvəzedici komandanın oyunçuları təşkil edir. Üç-dörd təcrübəli futbolçu da var. Hələ çempionatın startına var. Çalışacağıq ki, yaxşı komplektləşək. Çoxları bizə inanmır, autsayder gözü ilə baxır. Əlimizdən gələni etməliyik ki, döyüşkən kollektiv yaradaq və turnir cədvəlinin dibində olmayaq.

- "Qarabağ" istisna olmaqla qalan klublarımız avrokuboklara uğursuz başladı. Səncə, cavab matçlarından nə gözləmək olar?

- Həqiqətə qalsa, bu mövsüm püşkatmada çox çətin rəqiblər düşdü. Əsasən də "Zirə"yə. "Qarabağ" gücünü "Lex"ə də, "Sürix"ə də göstərdi. Odu ki, çempionun mərhələ keçəcəyini düşünürəm. "Makkabi" nə qədər güclü rəqib olsa da, "Zirə"nin evdə 0:3 hesablı məğlubiyyətini gözləmirdik. İsraildə "Makkabi"yə müqavimət göstərmək çox çətindi. Sabiq komandam "Qəbələ" matça yaxşı başladı, qol da vurdu, fərqi artırmaq imkanları da vardı. Amma İlkin Qırtımovun zədələnməsi və müdafiədəki boşluqlar üzündən buraxdığı qollarla işini çox çətinə saldı. "Neftçi"nin səfərdə 2 top fərqiylə uduzması da gözlənilməz oldu. Hər üç klubumuzun mərhələ keçmək şansı möcüzəyə bağlıdı. İstənilən halda, təmsilçilərimizə uğurlar diləyirəm və inanıram ki, yaxşı oyun sərgiləyəcəklər.

ABDULLA İSMAYILOĞLU