"İmişliyə yaxşı nəticə üçün gəlmişdik. Amma rəqibin stadionunun qazonu bərbad gündə idi. Yağış altında oynamağımız örtüyü daha da yararsız vəziyyətə saldı. Bilmədik futbol oynayaq, bataqlıqdan çıxaq, yoxsa zədəsiz meydanı tərk edək. Yəni, belə məkanda oynamazlar.

Heyətimizdə itki də var. Təcrübəli futbolçumuz və kapitanımız Elvin Yunuszadə zədəlidi. Onun ayağında şiş var. Buna rəğmən, yetirmələrim xarakter göstərərək döyüşdü. Hesabı da biz açdıq. İlk hissənin gedişində rəqib oyunçu qırmızı vərəqə alsa da, həvəsdən düşmədilər, istəkliydilər. Azarkeşlər də "İmişli" üçün əlavə motivasiya idi. Qapımıza haqsız penalti təyin olundu. Qazonla yanaşı, hakimlik də bizə mane oldu. Qalib gəlsək də, hakimlikdən narazıyam. Referi bizə qarşı qərəzliydi. Elnur Cəfərova “qırmızı” verilməsinin səbəbi kimi hakimə qeyri-etika ifadə işlədilməsi göstərilib. Amma belə deyil. Məhz rəqib futbolçu hakimə yaxınlaşıb futbolçumuzun guya referini söydüyünü çatdırıb. 41-ci dəqiqədə isə "İmişli"nin futbolçusu qapıçımız Kamran İbrahimova aşkar kobudluq etsə də, hakim əlini cibinə atmadı. Qolkiperimiz zədələndi və məcburi əvəzetmə etdik. Hakim qərəzinə dözməyən köməkçim Orxan Verdiyev də etiraza görə sarı vərəqə aldı. Bir sözlə, hakimlikdən narazıyam".