Dünən 1-ci divizionda qış fasiləsindən sonra baş tutan ilk tura yekun vuruldu. Diqqət çəkən qarşılaşmalardan biri "Zaqatala" ilə MOİK arasında baş tutdu.

Gərgin keçən matçda hesabda geri düşən meydan sahibləri son dəqiqələrdə qollar vurmaqla məğlubiyyətdən qaçdı - 2:2.

"Football-plus.az" saytı olaraq "Zaqatala"nın baş məşqçisi Rüstəm Məmmədovdan qarşılaşma ilə bağlı fikirlərini öyrəndik:

"Əvvəla onu deyim ki, rayonumuzda həmiin gün hava şəraiti olduqca kəskin idi. Qar yağdığından meydanda heç nə görünmürdü. Matçın təxirə salınmaq ehtimalı da vardı. Lakin sonda rəsmi şəxslər stadiona yenidən baxış keçirdi, işçilər də örtüyü qardan təmizləyəndən sonra icazə verildi. Belə havada oynamaq olduqca çətin idi.

Oyuna pis başlamadıq, amma kobud səhvlər üzündən qollar buraxdıq. Rəqib də istəkliydi. Yetərincə qol imkanını boşa verdik. Oyunun sonlarına yaxın tempi artıraraq 2 qol vurduq. 2 xal itirdik, amma 1 xal qazandıq.

Belə ağır hava şəraitində hər iki komanda meydanda əzmlə mübarizə apardı. Yetirmələrim yaxşı döyüşdülər, onlara təşəkkür edirəm. Qələbə qazana bilməsək də, ən azı doğma meydanda uduzmadıq. Toplanışı istədiyimiz kimi keçirə bilmədik. Yoxlama oyunlarının sayı da az oldu. Həmçinin heyəti tam komplektləşdirə bilmədik.

Düşünürəm ki, 2-3 oyundan sonra meydanda istədiyim komandanın görəcəm və daha yaxşı çıxış etməyə başlayacağıq".

ABDULLA İSMAYILOĞLU