A seriyasının 32-ci turundan sonra “Napoli”nin çoxdan gözlənilən çempionluğu rəsmiləşə bilərdi. Bunun üçün lider qalib gəlməli, əsas izləyicisi isə xal itirməli idi. Bu variantlardan yalnız biri reallaşdığı üçün Neapolda gözlənilən çempionluq bayramı təxirə düşdü.

“Latsio” üçün səfərdə “İnter”ə qarşı oynamaq heç də asan olmayacaqdı. Milanlılar son vaxtlar çempionatda həddən artıq xal itirdikləri üçün romalılara qarşı matça dönüş nöqtəsi kimi baxırdılar. “Latsio”nu məğlub etmək “İnter”ə həm də Çempionlar Liqasının (ÇL) növbəti mövsümündə iştirakını təmin etmək üçün lazım idi.

Simone İnzaqinin komandası ilk hissəni məğlub başa vurduğu oyunun ikinci yarısında geridönüş etməklə 3:1 hesablı qələbə qazandı. Məğlubiyyətə baxmayaraq, “qartallar” 2-ci yerdəki mövqeyini itirmədilər.
Romalıların uduzmasından sonra “Napoli”yə evdə “Salernitana”nı məğlub etmək qalırdı. Bu halda Neapolda çoxdan gözlənilən bayram təntənəsi başlayacaqdı. Luçano Spallettinin komandası rəqibin təşkilatlanmış oyunu və sıx müdafiəsinə qarşı uzun müddət yorulmadan mübarizə aparmalı oldu.

Nəhayət, müdafiəçi Olivera 62-ci dəqiqədə yerli tribunaları ayağa qaldırdı. Neapolluların azı bu hesabı qoruyacaqlarını düşünmək olardı. Lakin Dianın 84-cü dəqiqəyə təsadüf edən baxımlı zərbəsi meydan sahiblərini sükuta qərq etdi. Spallettinin komandası son saniyələrə qədər növbəti qolu vurmağa çalışsa da, buna nail ola bilmədi. Başqa sözlə, “Napoli”nin çempionluğu təxirə salındı.

Turun diqqəti cəlb edən əsas faktı Roma və Milan təmsilçilərinin dueli ilə bağlı oldu. Paytaxtdakı matçı da izləməyə dəyərdi. Oyun baxımlı alınmasa da, gərginlik ən yüksək həddə idi. ÇL-ə vəsiqə üçün çarpışan “Roma” və “Milan” azarkeşlərinə son dəqiqələrdə hər mənada böyük həyəcan yaşatdılar. Əsas vaxta əlavə olunan dəqiqələrdə vurulan qarşılıqlı qollar matçın 1:1 hesabıyla bitməsini təmin etdi. Bu heç-heçə heç bir tərəfi qane etmədi. Çünki hər iki komanda xalını 57-yə artırmaqla 5-6-cı yerləri bölüşməli oldu. Bu qədər xalı olan “İnter” topların daha yaxşı fərqinə əsasən 4-cü yerə yüksəldi.

Nəhayət, “Yuventus” çempionatdakı 3 oyunluq məğlubyyət seriyasına son qoydu. Bolonyada eyniadlı qəiblə oyun 1:1 hesabıyla sona çatdı. Turinlilər bununla 3-cü yerdəki mövqeyini qorudular. Onların qolunu vuran Milikin penalti şansından yararlana bilmədiyini də qeyd edək.

“Torino”nu səfərdə 2:1 hesabıyla məğlub edən “Atalanta” 7-ci yerdəki mövqeyini möhkəmləndirməklə yanaşı “ÇL zonası”na bir qədər yaxınlaşdı.