''Napoli'' 33 illik həsrətə son qoyaraq tarixinin 3-cü çempionluğunu qazanmağa çox yaxındı.

"Football-plus.az"ın məlumatına görə, komandanın tarixi mövsüm keçirməsində mühüm rol oynayan Xviça Kvaratsxeliya ilə bağlı maraqlı xəbər var.

Belə ki, bu günlərdə Neapolda doğulan bir uşağa gürcüstanlı legionerin adı verilib. Neapolda yaşayan və ''Napoli'' fanatı olan Armando ilə Klara yeni doğulan uşağa Daniele Xviça adını vermək qərarına gəliblər. Bu, şəhərdə gürcüstanlı futbolçunun adı verilən ilk uşaqdı.

Maraqlıdı ki, uşağın atasının da adı ''Napoli''nin əfsanəsi Dieqo Armando Maradanın şərəfinə qoyulub. Kvaratsxeliya bu mövsüm artıq 32 rəsmi oyunda 14 qol, 16 məhsuldar ötürməlik möhtəşəm performans sərgiləyib. Müqayisə üçün bildirək ki, Maradona ''Napoli''dəki ilk mövsümündə 36 rəsmi oyunda 17 qol, 11 məhsuldar ötürmə ilə fərqlənmişdi.