Yanvarın 28-də Braziliya Superkubokunun qalibi müəyyənləşdi.

Paytaxt Braziliadakı Milli Stadionda keçirilən oyunda son çempion “Palmeyras”la ölkə kubokunun son sahibi “Flamenqo” qarşılaşdı. Matç portuqaliyalı mütəxəssislərin dueli ilə əlamətdar oldu. Qeyd edək ki, “Palmeyras” 2020-ci ilin oktyabrından 44 yaşlı Abel Ferreyranın rəhbərliyi altında çıxış edir. Ötən ilin fevralından noyabrına qədər “Korintians”ı çalışdıran 54 yaşlı Vitor Pereyra isə “Flamenqo”ya dekabrda təyinat alıb. 2022-ci ildə sabiq çalışdırıcısı Dorival Juniorun başçılığı altında Libertadores Kubokunda da azarkeşlərinə qələbə sevinci yaşadan rio de janeyroluların A seriyasında 5-ci yeri tutması rəhbərliyi qane etməmişdi.

Superkubok matçı olduqca dramatik alındı. Hesabı “Flamenqo” açsa da, son çempion fasilə ərəfəsində vurduğu iki qolla üstünlüyü ələ aldı. Pereyranın komandası ikinci hissənin əvvəlində aparıcı hücumçusu Qabriel Barbozanın növbəti qolu ilə hesabı bərabərləşdirdi. Tərəflərin açıq futbola üstünlük verməsi qalan vaxtda qapı torlarının daha üç dəfə silkələnməsinə şərait yaratdı. Sonda 4:3 hesabıyla qalib gələn “Palmeyras” Superkubokda ilk uğuruna nail oldu. Qeyd edək ki, çempionla ölkə kubokunun qalibi arasında matçlar ilk dəfə 1990-92-ci illərdə keçirilsə də, sonradan buna ehtiyac duyulmayıb. 2020-ci ildən yenidən təşkil olunan Superkubokda ən çox qalib gələn komanda “Flamenqo”du. “Qırmızı-qaralar”ın son 4 ildə bu kubok uğrunda oyunlarda müntəzəm iştirak etdiklərini və iki dəfə qalib olduqlarını da xatırladaq.

Palmeyras – Flamenqo 4:3
Rafael Veyqa, 38; 58-p. Qabriel Menino, 45+4; 74 - Qabriel Barboza, 26-p.; 51. Pedro, 61.
Palmeyras: Ueverton, Markos Roşa, Q.Qomes, Pikeres, Murilo, Ze Rafael (Luan, 87), Rafael Veyqa, Qabriel Menino (Jailson, 79), Dudu (Breno Lopes, 87), Roni (Rafael Navarro, 87), Endrik (Mayke, 64).
Flamenqo: Santos, David Luis, Varela (Mateuzinyo, 76), Leo Pereyra, Ayrton Lukas (Mateus França, 89), Everton Ribeyro, Tyaqo Maya, De Arraskaeta (Everton, 76), Jerson (Vidal, 80), Pedro, Qabriel Barboza.