Argentina çempionatında fevralın 17-20-si aralığında 4-cü turun oyunları keçirildi. Tur daha çox liderin və ötən mövsümün mükafatçılarının qələbəsi ilə yadda qaldı.


Football-plus.az xəbər verir ki, mövsümə ardıcıl üç qələbə ilə başlayan “Lanus” hesabat turunda da uğurlu nəticə göstərdi. Frank Kudelkanın komandası ilk turlarda 7 xal qazanan “Rosario Sentral”ı qonaq etdi. Matçın lider üçün asan keçməyəcəyini güman etmək olardı. İlk hissədəki mübarizə bu gümanı böyük ölçüdə doğrultdu. Fasilə ərəfəsində ev sahibləri hesabı açmaq üçün əla fürsət əldə etdilər, amma Troyanski penaltini qola çevirə bilmədi. Matç bərpa olunandan sonra “Lanus” üstünlüyü tam ələ alaraq rosariolulara heç bir şans vermədi. Həmin Troyanski 56-cı dəqiqədə Bocconun ötürməsi ilə hesabı açdı. Qonaqlar özünə gəlməmiş De la Veqa ikinci topu qapıdan keçirdi.

Bununla da “Rosario Sentral”ın müqavimət gücü heçə endi. Hücumları davam etdirən lanuslular Orosko ilə hesabı darmadağın həddinə çatdırdılar. Kudelkanın komandası maksimum göstərici ilə liderliyini davam etdirdi.

Tura 7 xalla başlayan liderin əsas izləyicilərindən yalnız biri qələbə qazandı. “Atletiko Urakan” evdə “Barrakas Sentral”ın qapısından iki cavabsız top keçirdi. Bu qələbə paytaxt komandasını liderin əsas təqibçisinə çevirdi. Çünki “Rosario Sentral” kimi “Belqrano” da xal qazana bilmədi: səfərdə “Arxentinos Xuniors”dan üç cavabsız top buraxdı.

Əvvəlki turun “Talyeres de Kordoba” ilə səfər matçında 1:2 hesabı ilə məğlub olan “Boka Xuniors” ilk uğursuzluğun əvəzini “Platense”dən çıxdı. Son çempion evdə 3:1 hesabı ilə qalib gəldi. İnamlı qələbə Uqo İbarranın komandasının cədvəldə birdə-birə 10 pilləlik sıçrama ilə 7-ci yerə çıxmasına şərait yaratdı.

Nəhayət, “Rasinq” azarkeşlərinin məyusluğuna son qoydu. Son mövsümün vitse-çempionu yeni mövsümün ilk üç turunda hesabına yalnız 2 xal yaza bilmişdi. Fernando Qaqonun komandası uğursuz startın acığını “Arsenal”dan çıxdı. İlk hissədə sarandililərin qapısından üç cavabsız top keçirən Fernando Qaqonun komandası 21-ci yerdən 13-ə yüksəldi.

“River Pleyt” də rəqib meydanında maksimum nəticəyə nail oldu. Ölkə çempionatının bürünc mükafatçısı “Tiqre”yə bir qolla qalib gəldi. Müdafiəçi Leandro Qonsalesin dəqiq zərbəsi Martin Demiçelisin çalışdırdığı komandanın xalını 9-a çatdırdı. Amma “milyonçular”ın 5-ci yerdəki mövqeyi dəyişmədi.
3 turdan sonra xal qazana bilməyən yeganə komanda olan “Kolon” uğursuz gedişə son qoydu. Santa felilər “Union”la 1:1 hesablı heç-heçəyə nail oldular və çempionatda xalsız komanda qalmadı.