“Neftçi”nin əməkdaşı başverənləri belə şərh etdi:“Turan Tovuz”un futbolçuları tez-tez yerdə qalır, hhər vəchlə vaxt aparırdı. Bizim məşqçilərdən biri dedi ki, futbolçulara belə hallarda topu rəqibə verməmələrini çatdır. Bunu söyləyəndən sonra qonaqların fiziki hazırlıq üzrə məşqçisi mənə tərs-tərs baxdı. Emin hesabı bərabərləşdirəndə sevincimizin həddi-hüdudu yox idi. Futbolçularla sevinəndən sonra geri qayıdanda “indi nə qədər istəyirsizsə, vaxt aparın” dedim və gəlib yerimdə oturdum. “Turan Tovuz”un məşqçisi üstümə hücum çəkmək istəyirdi. Ona dedim ki, oyundan sonra harda istəsə, görüşə bilərik. Belə çox da ciddi məsələ baş vermədi. Qələbəyə çox sevindik. Oyundan sonra stadionu tərk edəndə “Turan Tovuz”un üzvlərindən stadionda kimsə qalmamışdı”.

“Larnakadakı oyunu xatırlayırsız? “Aris”ə 0:2 hesabıyla məğlub olduq. Cənubi kiprlilərin məşqçisi Regekampfın düz gözünün qarşısında sevinirdi. Özü də göstərə-göstərə. Bu da məni qıcıqlandırmışdı. Bakıdakı oyunda hesabı biz açdıq. Onda özümü sıxdım. Düşündüm ki, birdən qol vurarlar. İkinci qoldan sonra da dözdüm. Üçüncüdə isə özümü saxlaya bilmədim. Onların etdiyini mən də təkrarladım. Amma həmin görüşdə “qırmızı” almamışdım. Hakim məni sarı vərəqə ilə cəzalandırmışdı”.