Premyer-liqada işləri yaxşı getməyən “Səbail” ölkə kubokubdan da çəkildi.

"Football-plus.az" xəbər verir ki, Şahin Diniyevin çalışdırdığı “dənizçilər” yarımfinalda iki oyunun nəticəsinə görə “Qəbələ”yə uduzmaqla avrokubok şansını itirdi. Görəsən, mövsümün ilk yarısında “Səbail”in məşqçilər korpusunda yer alan, baş məşqçi Mahmud Qurbanovun köməkçisi funskiyasını yerinə yetirən Zaur Ramazanov “dənizçilər”in çıxışı barədə nə düşünür, Diniyevin Bayıl təmsilçisini elitada saxlayacağına inanır?

Ramazanovla söhbətə kubokun cavab qarşılaşmasından başladıq.

- Yəqin dünən (srağagün) keçirilən qarşılaşmanı izləmisiz?
- Bəli, hər iki oyuna baxmışam.

- Fikirlərinizi bilmək istərdik.
- Səfərdən keçirilən ilk matçda “Səbail” iki qol vurmasına baxmayaraq, görünürdü ki, Şahin Diniyev daha çox premyer-liqanı düşünür. Heyətə nəzər yetirəndə bunu görmək olardı. İstər Qəbələdə, istərsə də Bayılda baş tutan görüşlərdə Elmar Baxşıyevin komandası daha yaxşı göründü və əziyyətinin bəhrəsini gördü. İki oyunda qeydə alınan hesab hər şeyi əks etdirir.

- Sizin dönəminizdə də komanda sonuncu pillədə idi, indi də. Sizin vaxtınızda komanda ölkə kubokunun yarımfinalına yüksəlmişdisə, artıq mübarizəni dayandırıb. Şahin Diniyevin gəlişi ilə nə dəyişib, nə dəyişməyib?
- Demək olar, heç nə. Nəticə göz qabağındadı. Mövsümün ilk yarısından sonra biz artıq bilirdik ki, komandada nəyi düzəltmək, kimi çıxarmaq, hansı mövqeni gücləndirmək lazımdı. Bu yöndə də iş gedirdi. Diniyev gəldi və dedi ki, dəyişikliyə ehtiyac yoxdu. İndiki heyətə güvəndi. Özünüz də görürsüz ki, onun güvəndiyi futbolçular etimadı doğrultmur. Hamı görür ki, dəyişən heç nə yoxdu. “Səbail” son pillədədi, kubokda da çıxışını dayandırdı. Həmin sualı mən sizə verim. Nə dəyişib? İrəliləyş adına heç nə yoxdu.

- Çempionatla bağlı fikirlərinizi də bilmək istərdik.
- Turnir cədvəli reallığı əks etdirir. “Qarabağ”ın çempionluğa oynayacağı avqustdan bəlli idi. Qurban Qurbanovun komandası ümidləri doğruldur və böyük ehtimalla növbəti “qızıl”ını qazanacaq. “Sabah”ın da iddialı olacağı bilinirdi. Bu gün də istədiyi yerdədi. Murad Musayev açıqlamalarında ağdamlıların çempionluğa daha şanslı olduğunu dəfələrlə bildirib.

“Neftçi”yə gəlincə, çempionluq uğrunda oynamayacaqları bəlli idi. Sadəcə, mükafatçı olub avrokuboklara vəsiqə barədə düşünürdülər. Hadisələrin xoş axarı nəticəsində bu gün kubokun finalına yüksəliblər. Bakılılar mövsümü tiltulla başa vura bilər. Bunun özü “Neftçi” üçün uğur sayılacaq. İkinci “beşlik”də daha gərgin mübarizəyə şahidlik edirik. Elitada qalmaq uğrunda mübarizə aparan komandalar hər xal uğrunda vuruşur.

- Sizcə, Şahin Diniyev “Səbail”i elitada saxlaya biləcək?
- Çətin sualdı. Açığı, nə cavab verəcəyimi bilmirəm. Daha yuxarı pillələrdə qərarlaşan rəqiblərlə aradakı xal fərqi o qədər də çox deyil. Bir qələbə turnir cədvəlində dəyişikliyə səbəb ola bilər. Ancaq istəməzdim ki, “Səbail” kimi yaxşı infrastruktura, sabit maliyyə dayağına malik klub premyer-liqanı tərk etsin. Sponsorlar komandanın uğurlu çıxışı üçün əlindən gələni edir. O başqa mövzudu ki, futbola öz yanaşmaları var.

- Bu gün avrokuboka 4-cü vəsiqə uğrunda “Qəbələ” ilə “Zirə” arasında gərgin mübarizə gedir. Necə düşünürsüz, qitəmiqyaslı turnirə son vəsiqə kimə qismət olacaq?
- Mövsümboyu “Qəbələ” maraqlı və baxımlı oyun sərgiləyib, uduzduğu matçlarda da yaxşı təsir bağışlayıb. “Zirə”nin də şansı var. Son turlar çox maraqlı olacaq. Şansa gəlincə, fikrimcə, Elmar Baxşıyevin komandası yarım addım öndədi. Hazırda həm 4-cü pillədədi, həm də kubokun finalına yüksəlib. Təqvim də hər iki komanda üçün uyğundu. “Qəbələ”ni çətin “Qarabağ” səfəri gözləyir. Qalan 4 görüşdə ikinci “beşlik”dəki kollektivlərlə üz-üzə gələcəklər. “Zirə” də “Sabah”la matçı nəzərə almasaq, qalan oyunlarda aşağı pillələrdə yer alan komandalarla qarşılaşacaq.

- Yeni iş təklifi almısız?
- Hələ ki bu yöndə yenilik yoxdu. Mövsümün sonuna az qalıb. Yayı gözləyək. Bəlkə də iş təklifi oldu.

RƏŞAD