Dünən Türkiyə çempionatında keçirilən 2 oyunla 4-cü tura yekun vuruldu.

Football-plus.az xəbər verir ki, Əskişəhərdə keçirilən ''Konyaspor''la ''Fənərbaxça''nın dueli maraq doğururdu.

Çünki Konya təmsilçisi ilk 3 turda qol buraxmamışdı. ''Fənərbaxça'' isə ilk 3 tura 13 qol vuraraq öz məhsuldarlıq rekordunu təkrarlamışdı. Amma bu dəfəki qarşılaşmada İstanbul nəhəngi ümidləri doğrulda bilmədi. ''Fənər''in əsas qol silahı, bombardirlər yarışına başçılıq edən Enner Valensiya 22-ci dəqiqədə lazımsız bir hərəkətə yol verərək birbaşa qırmızı vərəqə aldı. Düzdü, meydan sahibləri də 54-cü dəqiqədə Adil Dəmirbağın ikinci sarı vərəqəni alması ilə azlıqda qaldılar. Amma ''Konyaspor'' oyunboyu daha yaxşı təsir bağışlayaraq layiqli qələbə qazandı. Yeganə qolu 66-cı dəqiqədə Muhammet Dəmir vurdu.

Beləliklə, ''Konyaspor''un müdafiəsi ''Fənər''in hücumuna qalib gəldi. ''Sarı-lacivərdlilər'' bu mövsüm superliqada həm ilk dəfə məğlub oldular, həm də ilk dəfə meydanı qolsuz tərk etdilər. 2019/20-dən başlayaraq ''Konyaspor'' ''Fənər''i hamıdan çox – 4 dəfə məğlub edib! Bu nəticə həm də liderin dəyişməsinə səbəb oldu. Günün ikinci oyununda ''Beşiktaş'' ''Sivasspor'' üzərində 3:1 hesablı inamlı qələbə qazanaraq xalını 10-a yüksəltdi.

''Qaziantep''in də 4 turdan sonra 10 xalı var. Amma ''Qartal''daha yaxşı top-fərqinə malik olduğu üçün həftəni lider kimi tamamladı. ''Beşiktaş'' sonuncu dəfə ötən mövsümün 6-cı turunda lider olmuşdu. Zirvəni təhvil verməli olan ''Fənərbaxça'' isə 5-ci pilləyə gerilədi.