Dünən Türkiyə çempionatının 30-cu turunda daha 4 oyun keçirildi.

''Antalyaspor'' ''İstanbulspor''la səfər oyununda 3 dəfə hesabda geri düşsə də, 1 xal qazanmağı bacardı (3:3). ''Kayserispor''la ''Kasımpaşa''nın dueli qolsuz başa çatdı. Yığmamızın üzvü Mahir Emrelinin Türkiyə çempionatında vurduğu ilk qol ''Konyaspor''a düşərli olmadı. Konya təmsilçisi evdə ''Adana Dəmirspor''a uduzdu (1:2). Baxmayaraq ki, rəqib 48-ci dəqiqədən etibarən azlıqda qalmışdı. Ədalət naminə bildirək ki, qonaqların lehinə verilən və qələbə qolunun vurulması ilə nəticələnən penalti qərarı yanlış idi. VAR-ın olduğu dönəmdə hələ də səhv penaltilərin verilməsi diqqət çəkir. Təsadüfi deyil ki, ''Konyaspor'' cəbhəsi oyundan sonra ''od püskürərək'' Hakimlər Komitəsinin sədri Lalə Ortanı istefaya dəvət etdi!
Günün və turun mərkəzi oyununda ''İstanbul BŞ''nin qonağı olan ''Fənərbaxça'' son həftələrdəki ənənəsini davam etdirərək yenə ilk qolu buraxdıqdan sonra qələbə qazandı (2:1). Özü də komanda qolları 88 və 93-cü dəqiqələrdə vurdu! İstanbul nəhəngi ardıcıl 4-cü turda əzmkar qələbə qazanaraq lider ''Qalatasaray''la 6 xallıq fərqin artmasına imkan vermədi. Ümumiyyətlə, ''Fənərbaxça'' bu mövsüm hesabda geri düşdüyü qarşılaşmalarda ən çox (23) xal qazanan komandadı (7 qələbə, 2 heç-heçə, 5 məğlubiyyət). Maraqlıdı ki, Jorje Jezuş ''Fənər''in başında başakşəhərlilərə qarşı səfər oyununda qələbə qazanan ilk əcnəbi məşqçi kimi tarixə düşdü! Buna qədər 5 əcnəbi mütəxəssis - Ziko, Araqones, Daum, Advokaat və Pereyradan heç biri bunu bacarmamışdı.
[20.04 11:40] Əli: Superliqada daha 2 istefa
Mövsüm sona yaxınlaşdıqca istefaların sayı artmağa başlayıb. Türkiyə çempionatından daha 2 istefa xəbəri var. Bunlardan biri ''Alanyaspor''da baş verib. Ərsun Yanalın bu klubdakı dönəmi cəmi 52 gün davam etdi. Təcrübəli mütəxəssis fevralın 27-də bu vəzifəyə gəlmiş və ilyarımlıq müqaviləyə imza atmışdı. Komanda onun debüt oyununda qalib gəlsə də, sonrakı 5 qarşılaşmada cəmi 1 xal toplamaq mümkün oldu. Ən son evdə ''Qalatasaray''a 1:4 hesablı məğlubiyyətdən sonra Yanal rəhbərliyə ayrılmaq istədiyini bildirdi və onun istəyi klub tərəfindən qəbul olundu.

Digər istefa xəbəri superliqanın debütantı ''Ümraniyəspor''dan gəlib. İstanbul təmsilçisi Rəcəp Uçarla yollarını ayırıb. Turnir cədvəlinin zirzəmisində qərarlaşan, son 10 turda cəmi 1 qələbəsi olan komanda ən son səfərdə ''Fatih Karagümrük''ə 2:4 hesabı ilə uduzdu.

Qeyd edək ki, 2019/20-də ''Beşiktaş''da köməkçi məşqçi kimi çalışan 47 yaşlı Rəcəp Uçar ''Ümraniyəspor''un başına 2020-nin oktyabrında keçmişdi. O, ötən mövsüm bu klubu tarixində ilk dəfə elitaya yüksəltmişdi. Ümumilikdə ''Ümraniyəspor'' bu məşqçi ilə 97 rəsmi qarşılaşmadan 42 qələbə, 23 bərabərlik, 33 məğlubiyyətlə ayrılmış oldu.