Premyer-liqanın 31-ci turu çərçivəsində baş tutan “Şamaxı” – “Kəpəz” matçından sonra qonaqlar xoşagəlməz halla üzləşib.

Belə ki, “sarı-göylər”i Şamaxıya gətirən avtobus xarab olub. Və bu üzdən Gəncə təmsilçisi geriyə əlavə, kiçiktutumlu mikroavtobuslarla qayıtmaq məcburiyyətində qalıb. Gəncəli azarkeşləri ən çox narazı salan məqam isə həmin vaxt “Kəpəz”in İdarə Heyətinin sədri İlqar Nadirinin komandanı səfərdə başlı-başına buraxıb getməsi olub.

Söylənilənlərə aydınlıq gətirmək üçün Azad Mustafayevlə əlaqə saxladıq. Klubun mətbuat katibinin “Football-plus.az” saytına açıqlaması belə oldu:

“Əslində komandanı səfərə aparan avtobusda heç bir problem yox idi. Oyundan sonra sürücü dedi ki, avtomobil koda düşdüyündən əyləc sistemində nasazlıq yaranıb. Həmin dəqiqə klub rəhbərliyi əlavə avtobuslar təşkil edərək komandanın Gəncəyə qayıtmasını təmin etdi. İlqar Nadirinin komandanın yanında olmamasına gəlincə, hakimin final fitindən sonra stadionu tərk etdi. Avtobusda nasazlığın yarandığı isə sonradan bəlli oldu. Sizcə, klub rəhbəri kimi onun icazəsi olmadan kimsə özbaşına addım atar? Yaranmış vəziyyət barədə ona məlumat verilən kimi lazımi addımların atılmasın göstəriş verdi. Məhz ondan sonra klubun digər rəhbər şəxsləri komanda üçün əlavə avtomobillər sifariş etdi”.

RƏŞAD