Qomis artıq ''Qalatasaray''da oynamaq istəmir!
Dünən Türkiyə çempionatının 31-ci turunda lider ''Qalatasaray'' öz meydanında ''Fatih Karagümrük''ü yenə bilməyərək 2 mühüm xal itirdi (3:3).
"Football-plus.az" xəbər verir ki, tam sağlam olmayan İkardi ikinci hissənin gedişində meydana çıxdı və penalti qaçırdı!
Hücumda problem yaşandığı bir vaxtda Bafetimbi Qomisin adının iştirak ərizəsinə belə düşməməsi maraq doğurub. Oyundan sonrakı mətbuat konfransında baş məşqçi Okan Buruk 38 yaşlı fransalı forvardla bağlı gündəmi zəbt edən açıqlama verərək Qomisin artıq ''Qalatasaray''da oynamaq istəmədiyini deyib:
"Ötən tur ''Alanyaspor''la oyunda Barış Alpər Yılmazı oyuna buraxdıqdan sonra Qomis ertəsi gün mənə yaxınlaşaraq mövsümün qalan hissəsində oynamaq istəmədiyini dedi. Açığı, mənim üçün böyük sürpriz oldu. Artıq bu mövzuda qərarı rəhbərlik verəcək''. Başqan Dursun Özbək daha sərt açıqlama verib: ''Qomisi Türkiyəyə ilk dəfə mən gətirmişdim. Son hərəkətini anlamaq və qəbul etmək mümkün deyil. Bu klubun hər bir peşəkar futbolçusu kluba xidmət etmək məcburiyyətindədi. Ona da bu fikrimi bildirdim. Qərarları baş məşqçi verir. Onun seçiminə hər kəs hörmətlə yanaşmalıdı. Zatən bizdə bu mövsüm belə problem olmayıb. Hər kəs Okan Buruka hörmət edir. Qomisin nə üçün belə etdiyini bilmirəm. Düzgün davranış tərzi deyil və onu qəbul etmək mümkün deyil. İdarə heyətində bu məsələni müzakirə edəcəyik''.
Mövsümün əvvəlində vurduğu qollarla ''Cim-Bom''a mühüm xallar qazandıran Qomis sonradan İkardinin kölgəsində qaldı. Fransalı forvard bu mövsüm 26 rəsmi oyunda 10 qol, 3 məhsuldar ötürməlik performans sərgiləyib. Onun müqaviləsi bu yay başa çatır.
Digər xəbərlər
