Dünən Türkiyə çempionatında 3-cü tura start verildi.

Football-plus.az xəbər verir ki, açılış oyununda ''Qalatasaray'' ''Atatürk Olimpiya''da ''Ümraniyəspor''un qonağı oldu. ''Cim-Bom'' heyətdə önəmli hücum oyunçuları olmasına rəğmən yenə qol vurmaqla bağlı ciddi problemlər yaşadı. İlk turda Antalya səfərində olduğu kimi İstanbul nəhəngi yenə matçın son anlarında Bafetimbi Qomisin vurduğu qolla qalib gəldi. ''Aslan'' bununla da 3-cü turda 2-ci qələbəsini qazanaraq xalını 6-ya yüksəltdi.

Xatırladaq ki, komanda 2-ci turda öz meydanında ''Girəsunspor''a minimal hesabla uduzmuşdu. Okan Buruk ''Qalatasaray''ın başında çempionat çərçivəsində ilk iki səfər oyunundan qələbə ilə ayrılan cəmi 2-ci yerli mütəxəssis oldu. Daha öncə bunu 1960-cı ildə Coşqun Özarı bacarmışdı. Qomis isə klub tarixində superliqa çərçivəsində 40 qol həddinə çatan cəmi 4-cü əcnəbi futbolçu oldu. Cavad Prekazinin də aktivində 40 qol var. İndi Qomis bu göstəricidə yalnız Milan Baroş (48) və George Hacidən (59) geri qalır.