“Bu mövsüm 26-cı rəsmi oyunumuzu keçirdik. 26 matçda bu qədər qeyri-sabit performans sərgiləmək normal bir durum deyil. Diqanozu qoyula bilməyən xəstəyə bənzəyirik. Halbuki vəziyyəti düzəltmək üçün hər şeyi sınaqdan keçiririk. Artıq rəhbərliklə durum dəyərləndirməsi etməyin zamanıdı”. Təbii ki, futboldan az-çox anlayan insan dərhal bunun istefa verməyə hazırlaşan bir məşqçinin sözləri olduğunu dərk edir. Komanda bu mövsüm 3-cü dəfə bir oyunda ən azı 4 top buraxdı ki, daha öncə Abdulla Avcının məşqçi karyerasında belə uğursuzluq olmamışdı. Statikstika da onu göstərir ki, “Trabzonspor” 38 illik həsrətə son qoyaraq çempion olandan sonra komandada inanılmaz bir geriləmə var. Təkcə bir faktı vurğulayaq ki, qaradənizlilərin passivində 4 məğlubiyyət var və komanda bu göstəricidə artıq indidən ötən mövsümü (3 məğlubiyyət) geridə qoyub. Üumumiyyətlə, bu vəzifəyə 2020-ci il noyabrın 10-da gələn Avcı “Trabzonspor”un başında ən zəif dönəmini keçirir. Komanda 2020/21-də onun başçılığı altında hər oyuna orta hesabla 2,03, 2021/22-də 2,13 xal toplamışdısa, hazırda bu rəqəm 1,70-ə bərabərdi! “Bordo-mavililər” ötən mövsüm 17 oyuna 42 xal toplamışdılar və ən yaxın rəqibdən 9 xal öndə olmaqla inamla turnir cədvəlinə başçılıq edirdilər. Hazırda komanda 17 oyuna 29 xal toplayıb və liderdən 10 xal geridə olmaqla 6-cı pillədə qərarlaşıb. Belə göstəricilərdən sonra Avcının istefa barədə düşünməsi təəccüblü deyil. Amma rəhbərlik onu bu cür asanlıqla əldən verəcəkmi? Əsas sual da məhz budu. Bəzi mənbələr iddia edirdi ki, təcrübəli mütəxəssis çərşənbə axşamı komandanın başında son məşqinə çıxdı. Dünən komandada istirahət günü idi və Avcının İstanbuldakı evinə gəlməsi diqqəti çəkdi. 59 yaşlı mütəxəssis öz evində başqan Ahmet Ağaoğlu ilə görüş keçirərək hər şeyi müzakirə etdi. Avcıya rəhbərlikdən ilk dəstəyi vitse-prezident Ərtuğrul Doğan verdi. O, sosial şəbəkədə məşqçiyə güvəndiklərini yazaraq onunla yola davam ediləcəyinə işarə vurdu. İstanbuldakı görüşün ardından isə başqan Ağaoğlu jurnalistlərə bunları dedi: “Alınacaq tədbirləri, görüləcək işləri və problemlərin həllini birlikdə müzakirə etdik. Futbol ictimaiyyətinin bununla bağlı bir şübhəsi olmasın. Həmişəki kimi məşqçimizə və komandamıza güvənirik. Fanatlarımıza da səbirli davrandıqları üçün təşəkkür edirik. Son nəticələrimizin onları çox üzdüyünün fərqindəyik. Buna baxmayaraq, komandaya dəstək verməkdə davam edirlər. İndi onların dəstəyinə həmişəkindən daha çox ehtiyacımız var”.