Çox yox, cəmi bir il öncə “Trabzonspor” camiəsində əsl qələbəlik hökm sürürdü. Fanatlar hər ev oyununda tribunaları doldururdu və komanda əmin addımlarla çempionluğa doğru gedirdi. Amma geridə qalan 365 gün ərzində bu klubda baş verən dəyişikliklərə adamın inanmağı gəlmir. İndi komandada nə Ahmet Ağaoğlu var, nə də Abdulla Avcı. Üstəlik “Trabzonspor”un bu mövsüm üçün artıq heç bir hədəfi qalmayıb.

Komanda avrokuboklarda və ölkə kubokunda mübarizəni dayandırıb. Çempionatda isə 26 oyuna liderdən 19 xal az - 44 xal toplanılıb ki, bu gedişlə komandanın “avrokubok zonası”na düşməsi də çətin görünür.

Yeni prezident Ərtuğrul Doğan seçkidə qalib gələndən dərhal sonra baş məşqçi məsələsini həll etməyə çalışsa da, bu, gözdən pərdə asmaq kimi bir şey idi. Uzun illər klubda Avcının köməkçisi olan Orhan Ak onun istefasından sonra baş məşqçi postuna keçmişdi. Yeni rəhbərlik hətta Akı mövsümün sonuna qədər komandanın başında saxlamaq istəyirdi. Amma kubokda “Ankaragücü”yə məğlubiyyətdən sonra böyük camiənin yükünü daşıya bilməyəcəyini anlayan Ak istefa verdi. Özü də onun son mətbuat konfransında dediyi “bu saatdan sonra burda qalmağım kluba zərər verəcək. Ona görə də oyunçularla vidalaşdım.

Açığı, burda qalarkən də, ürəyimdə şübhə var idi. Gərək mən də Avcı ilə birlikdə ayrılaydım” tipli fikirləri fanatlar böyük narazılıqla qarşıladı. Akının ayrılarkən sanki kluba minnət qoyması fanatlar və yerli mətbuat tərəfindən sərt tənqid olundu.

Məşqçi məsələsi hələ də aktuallığını qoruyur. Komanda məşqlərini və “Kasımpaşa” ilə oyuna hazırlığı İhsan Dərəlioğlunun başçılığı altında davam etdirir. 61 yaşlı Dərəlioğlu bu mövsüm “Trabzonspor”da oyunçu izləmə komitəsində çalışırdı. Qeyri-adi bir şey baş verməsə, “Trabzonspor” bu gün “Kasımpaşa” ilə oyuna məhz bu məşqçinin başçılığı altında çıxacaq. Dərəlioğlu buna qədər artıq bir dəfə komandanı məşqçi kimi meydana çıxarıb. O vaxt da qaradənizlilər məşqçi axtarışında idi. Bu hadisə 2020-nin noyabrında baş vermişdi. Avcı gəlməmişdən 1 həftə əvvəl “Trabzonspor” Dərəlioğlu ilə “Alanyaspor” səfərindən 1:1-lik bərabərliklə qayıtmışdı. Namizədlərə gəlincə, rəhbərliyin əsas hədəfi Sərgən Yalçındı. Amma ilyarımdı işsiz olan Sərgəni razı salmaq asan məsələ deyil.

Digər namizədlər İlhan Palut, Çağdaş Atan, Samet Aybaba və Rza Çalımbaydı. Vinçentso Montella ilə Fatih Təkkə də rəhbərliyin diqqət mərkəzindədi. Aprelin 16-da komandanı evdə “Beşiktaş”a qarşı prinsipial oyun gözləyir. Həmin qarşılaşmaya qədər, yəni uzaqbaşı gələn həftə yeni məşqçinin adının açıqlanacağı gözlənilir. Yeri gəlmişkən, rəhbərlik kluba idman direkoru gətirməyi də planlaşdırır.