“Qalatasaray” rəhbərliyi Okan Burukla yeni müqavilə imzalamağa hazırlaşır.

"Football-plus.az" xəbər verir ki, Burukun işindən həm rəhbərlik, həm də fanatlar razıdı.

Bu mövsüm prinsipial matçların heç birində uduzmayan “Cim-Bom” çempionluq mübarizəsində rəqiblərindən çox öndədi. Komanda əmin addımlarla 23-cü çempionluğa doğru addımlayır.

Ötən yay Okan Burukla “1+1” illik müqavilə imzalanmışdı. Şərti 1 illik müqavilə, təbii ki, qüvvəyə minəcək və buna heç kim şübhə etmir. Amma rəhbərlik bununla kifayətlənmək istəmir. Türkiyə mətbuatının yazdığına inansaq, 49 yaşlı mütəxəssisə “1+3” illik yeni müqavilə təklif olunub. Burukun məvacibi də tədricən artırılacaq. Onun bu mövsümdəki illik qazancı 17 milyon lirədi. Rəhbərlik gələn mövsüm bu məbləği 20, iki ildən sonra isə 30 milyon lirəyə qaldırmağı planlaşdırır.

Düzdü, 2024-də klubda prezident seçkisi olacaq və nələrin baş verəcəyi bilinmir. Amma indidən bir məqam dəqiqdi ki, daha öncə “İstanbul BŞ” ilə çempion olan Okan Buruk ən azı gələn mövsüm də komandanın başında olacaq.