“Qalatasaray” rəhbərliyi bəzi oyunçuların məvacibini artırmaq qərarına gəlib.

Bunların başında Viktor Nelsson gəlir. Müdafiədə etibarlı oyun göstərən 23 yaşlı danimarkalı müdafiəçiyə “Sevilya”nın marağı davam edir. Amma Markaodan fərqli Nelsson İspaniyaya yollanmağa tələsmir. Onun 900 min avroluq maaşı 1,2 milyon avroya qaldırılıb. Müqavilənin digər şərtləri olduğu kimi saxlanılıb. Nelssonun “Qalatasaray”la 2026-ya qədər müqaviləsi var və sərbəst qalmaq maddəsi 25 milyon avroya bərabərdi. Rəhbərlik qarşıdakı mundialda Nelssonun ulduzunun bir qədər də parlayacağına və ona görə daha ciddi təkliflərin olacağına ümid edir. Nelssondan sonra növbəti hədəf Saşa Buydu. Bu mövsüm oyunu ilə alqış qazananlardan biri olan 22 yaşlı fransalı müdafiəçinin məvacibi 480 min avrodan 800 min avroya qaldırılacaq.

Rəhbərliyin diqqət mərkəzində saxladığı yerli oyunçular isə Kərəm Aktürkoğlu ilə Yunus Akgündü. 3 yerli futbolçu məcburiyyəti üzündən hər oyunda start heyətində oynayan bu ikili mövsümə yaxşı başlaya bilməyib. Deyilənə görə, Yunus az qazancı üzündən tam potensialını göstərə bilmir. Çünki o, hazırda illik cəmi 900 min lirəlik (təxminən 50 min avro) məvacibi ilə klubda ən az qazananlardan biridi. Üstəlik onun müqavilə müddəti 2024-də başa çatacaq. Rəhbərlik bu oyunçuya yeni müqavilə təklif etməyi və illik qazancını 10-12 milyon avroya yüksəltməyi planlaşdırır. Fanatların çox şey gözlədiyi Aktürkoğluna gəlincə, onun müqaviləsi ötən ilin dekabrında yenilənmiş və məvacibi də 10 milyon lirəyə qaldırılmışdı. Amma məlum olub ki, istedadlı futbolçu ilə 20 milyon lirə qazanmaq istəyir. Rəhbərlik ona maksimum 18 milyon lirə, yəni təxminən 1 milyon avro maaş ödəməyə hazırdı. “Qalatasaray” yeni şərtlərdə imzalanan müqavilələrdən sonra Yunusla Kərəmin performansının artacağına ümid edir.