Türkiyənin 1-ci liqasında mövsümün başa çatmasına hələ 6 tur qalıb.

“Football-plus.az” xəbər verir ki, buna baxmayaraq, indidən elitaya yüksələn ilk klubun adına aydınlıq gəlib. Söhbət “Samsunspor”dan gedir. Bu komanda son turda öz meydanında “Tuzlaspor”u minimal hesabla yenərək xalını 66-ya çatdırdı. Tura 57 xalla 2-ci pillədə daxil olan “Eyupspor”un evdə autsayder “Gənclərbirliyi”nə uduzmasından sonra Samsun təmsilçisinin superliqaya yolu açıldı. Qaydalara görə aşağı liqadan elitaya birbaşa iki komanda vəsiqə qazanır. Hazırda “Çaykur Rizəspor”la “Eyupspor” 57 xalla 2-3-cü yerləri bölüşür. Turnir cədvəlində yaranmış vəziyyətə görə yalnız Rizə təmsilçisi samsunluları üstələyə bilər. “Eyupspor”un artıq belə şansı yoxdu. Çünki “Samsunspor” qalan 6 turun ikisində çempionatdan çəkilən klublarla oyuna görə texniki qələbələr qazanacaq. Yəni komanda ən pis halda mövsümü 72 xalla tamamlayacaq. “Eyupspor” isə qalan 6 turun 1-də meydana çıxmayacaq. Qalan 5 turun hamısında komanda qələbə qazansa belə, maksimum 72 xal toplayacaq. Şəxsi oyunlarda “Samsunspor”dan geridə olan bu kollektivin artıq ilk “2-liy”ə düşmək şansı qalmır.

2020/21-də pley-offun yarımfinalında uduzan, ötən mövsüm isə pley-off zonasına düşə bilməyən “Samsunspor” mövsümə Bayram Bektaşın başçılığı altında başlasa da, 6-cı turdan sonra baş məşqçi postuna Hüseyin Əroğlu gətirildi. Almaniyada doğulan, amma əslən izmirli olan 50 yaşlı mütəxəssis son 10 ildə “Altınordu”nu çalışdırmaqla diqqət mərkəzinə düşmüşdü. Çağlar Söyüncü, Cengiz Ündər kimi ulduzlar başda olmaqla müasir dönəmin bir çox tanınmış türkiyəli futbolçusu məhz onun yetirməsidi. “Samsunspor”u 7-ci pillədə qəbul edən Əroğlu ilk mətbuat konfransındaca iddialı açıqlamalar verərək fanatlara komandanı elitaya qaytaracağına söz verdi. Maraqlıdı ki, cəmi 176 gün sonra məşqçi vədinə əməl etdi! Əroğlunun təyinatından sonra “Samsunspor” dərhal yüksəlişə keçərək ardıcıl 20 oyunluq məğlubiyyətsiz seriya yaxaladı. Ümumilikdə komanda bu məşqçi ilə 1-ci liqada keçirdiyi 25 oyundan 17 qələbə, 6 heç-heçə, 2 məğlubiyyət ilə ayrılıb. Bununla da Türkiyə futbolunun tanınmış klublarından olan “Samsunspor”un 11 illik həsrəti başa çatıb. Komanda sonuncu dəfə elitada 2011/12 mövsümündə çıxış edib. 1965-ci ildə qurulan “Samsunspor” həm 1-ci liqada ən çox (6 dəfə) çempion olan, həm də elitadan ən çox düşən (7 dəfə) komanda statusundadı. 1993-2006-cı illərdə ardıcıl 13 mövsüm elitada oynayan, 1998-ci ildə İntertoto kubokunda yarımfinala qədər irəliləyən “ağ-qırmızılar” bir ara hətta 2-ci liqaya, yəni 3-cü diviziona qədər geriləmişdilər. Ərtuğrul Sağlam komandanı 1-ci liqaya qaytarsa da, superliqaya yüksəldə bilməmişdi. “Samsunspor”u bu uğur münasibətilə Türkiyənin gənclər və idman naziri Mehmet Kasapoğlu da təbrik edib.