Ən son ''Qalatasaray''ın şərəfini qoruyan və bu yay klubla müqavilə müddəti başa çatan Rayan Babelin yeni klubunun adına aydınlıq gəlib.

Football-plus.az xəbər verir ki, son günlər fiziki formasını qorumaq üçün ''Ayaks''ın əvəzedici heyəti ilə məşq edən məşhur niderlandlı vinger yenə Türkiyədə oynayacaq. Özü də elitada yox, 1-ci liqada! Belə ki, 35 yaşlı futbolçu ''Eyupspor''la birillik müqavilə imzalayıb. Tərəflər arasındakı xüsusi anlaşmaya görə ''Eyupspor'' elitaya vəsiqə qazansa, Babelin müqaviləsi avtomatik olaraq birillik yenilənəcək. '

'Eyupspor'' ötən mövsümü 1-ci liqada 6-cı pillədə tamamlamış, pley-offun yarımfinalında ''Bandırmaspor''a yenilmişdi. 2019-dan bu yana ''Cim-Bom''da olan təcrübəli vinger ötən mövsüm 43 rəsmi oyunda 4 qol, 2 məhsuldar ötürmə ilə yadda qalmışdı. ''Eyupspor''un İstanbulu təmsil etdiyini nəzərə alsaq, Babel Türkiyədə 4-cü dəfə bu şəhərin klubunda oynayacaq. İstanbuldan əl çəkə bilməyən Babel daha öncə bu şəhəri təmsil edən ''Qalatasaray'', ''Beşiktaş'' və ''Kasımpaşa''a forma geyib.