Oyunun gərgin mübarizə şəraitində keçəcəyi bəlli idi. Ən azı ona görə ki, “Zirə” təxminən bir saat əvvəl qələbə qazanmaqla yenidən 3-cü pilləyə yüksəlmişdi. “Qəbələ” flaqmanı məğlub etməklə öz yerinə qayıtmaq istəyirdi. Qonaqlar, demək olar ki, “Zirə”yə qarşı oynayan heyətlə meydana çıxmışdısa, “Neftçi”də vəziyyət fərqli idi.

Azər Əliyevin yoxluğunda Sayef müdafiənin sağında çıxış edirdi. Regekampf Höccəti də ehtiyatda saxlayaraq Ömərə şans vermişdi. Hiss olunurdu ki, rumıniyalı mütəxəssis eksperiment aparmaq istəyir. Lakin bu ilk yarıda işə yaramadı. Artıq 13-cü dəqiqədə Brkiçin səhvindən istifadə edən Maçado topu qapıdan keçirdi. Qoldan sonra da bakılılar çaşqınlıq içindəydi. Qonaqlar isə onların durumundan məharətlə yararlandı. 24-cü dəqiqədə Məqsədə qarşı cərimə meydançasında kobudluğa görə referi 11 metrlik cərimə zərbəsi təyin etdi. İsnik çox rahat şəkildə zərbəni qola çevirdi. “Neftçi” hissənin sonuna qədər çox çalışsa da, fərqi azalda bilmədi.

Regekampf fasilədən dərhal sonra üç dəyişiklik etdi: Azər, Höccət və Eddi döyüşə atıldı. Ömər, İsmayıl və Fərid meydandan çıxarıldı. Belədə “Neftçi”nin hücumlarının kəsəri artdı. Çünki Kenni öz mövqeyinə qayıdaraq yarımmüdafiənin sağında çıxış etməyə başladı. 61-ci dəqiqədə Abu Akal cərimə meydançasında Eminə qarşı qaydanı pozdu. “Qəbələ” futbolçularının kəskin etirazına baxmayaraq, Kamranbəy Rəhimov penalti təyin etdi. Zərərçəkən özü dəqiq zərbə ilə fərqi azaltdı. Bundan sonra “Qəbələ” hesabı qorumağa cəhd etdi. Hətta Elmar Baxşıyev Ülvinin əvəzinə Urfanı meydana buraxdı. “Neftçi” isə heç cür hesabı bərabərləşdirə bilmədi. Beləliklə, əsas rəqiblərinin üz-üzə gəldiyi həftədə “Neftçi” “soyuq duş” qəbul etdi.

Gözdən qaçmadı

* Komandalar “Neftçi”nin “Morethanfootball” layihəsi çərçivəsində autizmli uşaqlarla birgə meydana çıxdılar.
* Emin Mahmudov oyundan əvvəl komandanın 85 yaşlı azarkeşi Nəbiyevə “85” nömrəli forma bağışladı.
* Oyunu izləyənlər arasında “Neftçi”ni “İzmir Cup” turnirində təmsil edən U-12-nin üzvləri və məşqçilər heyəti də var idi.
* “Qəbələ”nin ilk qolu zamanı hakim VAR-a baxdı. Bunu qonaqların məşqçi heyəti və futbolçuları təəccüblə qarşıladılar. Kapitan Asif Məmmədov 4-cü hakim Rəşad Əhmədova “orda nə var idi?”, - deyə sual ünvanladı.