Argentina çempionatının 10-cu turunun oyunlarından sonra lider ilə əsas izləyicisi arasındakı 4 xallıq fərq dəyişmədi. Səbəb tura turnir cədvəlinin ilk iki pilləsində başlayan komandaların maksimum nəticə göstərməsi ilə bağlı oldu.

"Football-plus.az" xbər verir ki, “River Pleyt” qələbə seriyasını davam etdirir. Ölkə nəhəngi mövqeyini “Atletiko Urakan”ı məğlub etməklə qorudu. Martin Demiçelisin komandası maksimum nəticəni səfər oyununun ilk bir saatlıq hissəsində təmin etdi. “River” bu müddətdə rəqibin qapısından üç cavabsız top keçirdi. Ölkə çempionatının bürünc mükafatçısı ev sahiblərinin 22 yaşlı yarımmüdafiəçisi Pisarro 56-cı dəqiqədə meydandan qovulduğu üçün son yarım saatı say üstünlüyü ilə keçirdi. Və təbii ki, bu fakt “milyonçular”ın işinə yaradı. “River Pleyt” ardıcıl 5-ci, son 8 oyunda isə 7-ci qələbə ilə mövqeyini qorudu.

Tura hərəyə 17 xalla 2-4-cü yerlərdə başlayan komandalar fərli nəticələr göstərdilər. Topların daha yaxşı fərqinə əsasən 2-ci yerdə olan “San Lorenso” ardıcıl iki oyunda qələbə qazana bilməyəndən sonra azarkeşlərini sevindirdi. Ruben İnsuanın komandası “Atletiko Tukuman”a 3:1 hesabı ilə qalib gəldi. San Migel de Tukumandakı matç olduqca kobud axarda keçdi. Fasilə ərəfəsində ev sahiblərinin hücumçusu Puç ilə yarımmüdafiəçisi Gilyermo Akosta hakim Fernnado Espinosanın qərarına kəskin etiraz etdikləri üçün qarşısında qırmızı vərəqə gördülər. İlk hissə “San Lorenso”nun 2:1 hesablı üstünlüyü ilə sona çatdı. 53-cü dəqiqədə qonaqların müdafiəçisi Qaston Ernandes də meydandan qovuldu. Az sonra Legisamon dubl etməklə paytaxt komandasının qələbəsinə şübhə yeri qoymadı. “San Lorenso” bu qələbə ilə liderin əsas izləyicisi kimi mövqeyini qorudu.

Son turlar xal ehtiyatını xeyli artırmaqla 3-cü yerə yüksələn “Rasinq” mövsümə uğursuz startını unutdurmağa nail olmuşdu. Ötən mövsümün vitse-çempionu ardıcıl 3 qələbədən sonra La Platada büdrədi. Yerli “Ximnasiya” rəqibini 3:1 hesabıyla məğlub etdi. Nəticəyə təsir edən əsas fakt kimi qonaqların müdafiəçisi Qabriel Roxasın fasiləyə bir neçə saniyə qalmış ikinci xəbərdarlığa görə komandasını meydanda 10 nəfərlə qoymasını qeyd edək. Azlıqda mübarizə aparan “Rasinq” fasilədən sonra fərqi minimuma endirsə də, sonda daha bir top buraxaraq uduzdu. Məğlubiyyət Fernando Qaqonun komandasını 3-cü yerdən 6-ya saldı.

“Rosario Sentral” turu bir xalla başa vurdu. “Nyuellz Old Boyz” ilə səfər matçında hesab açılmadı. Rosario derbisində qeydə alınan nəticə qonaq komandanı 3-cü yerə yüksəltdi.

Tur son çempion üçün uğursuz alındı. Xatırladaq ki, 6-8-ci turlarda yalnız bir xal qazanan “Boka Xuniors”da baş məşqçi dəyişikliyi olmuş, rəhbərlik Uqo İbarra ilə yolları ayırmaq qərarına gəlmişdi. Paytaxt klubundakı fəaliyyəti yalnız 8 ay çəkən, bu müddətdə komandanı ölkə çempionluğuna daşıyan 49 yaşlı mütəxəssisin səlahiyyətləri müvəqqəti Mariano Errona tapşırılıb. 45 yaşlı məqçinin baş məşqçi kimi “Barrakas Sentral” ilə oyununa təsadüf edən debütü uğurlu alınmışdı. Səfərdə üç cavabsız top vuran “Boka Xuniors” bu dəfə evdə xal qazana bilmədi. Özü də tura sonuncu yerdə başlayan komandaya uduzdu.

Bəli, “Kolon” bu mövsüm ilk qələbəsini çempion üzərində qazandı! Son dəqiqələrdə buraxılan qol ölkə nəhənginin oyun planında ciddi çətinliklər yaşadığını bir daha göstərdi. “Kolon” isə 2:1 hesablı qələbə ilə sonuncu – 28-ci yerdən qurtularaq 23-cü pilləyə yüksəldi.