Argentina çempionatının yeni mövsümü qızğın mübarizə şəraitində davam edir. Martın 3-6-sı aralığında keçirilən 6-cı turun oyunlarından sonra turnir cədvəlində 4 komandanın şərikli liderliyi yerini ikihakimiyyətliliyə verdi. Diqqəti daha çox cəlb edən fakt tura ilk 7 yerdə başlayan komandaların qələbə qazana bilməməsi oldu.

Şərikli liderlərdən olan “Lanus” mövsümə ardıcıl dörd qələbə ilə başlayandan sonra yenə uduzdu. Frank Kudelkanın komandası bu dəfə turun mərkəzi oyununda evdə uğursuzqla üzləşdi. Lanusluların “River Pleyt” ilə mübarizəsinin asan keçməyəcəyini gözləmək olardı. Ölkə çempionatının bürünc mükafatçısı əvvəlki turda öz meydanında autsayder “Arsenal”a uduzmuşdu (1:2). Martin Demiçelisin çalışdırdığı “River” bu mövsüm evdə ilk dəfə məğlubiyyətin acığını “Lanus”dan çıxdı. Hər hissədə bir cavabsız qol vuran “milyonçular” 8-ci yerdən 6-cı pilləyə yüksəldilər. “Lanus” isə ardıcıl ikinci məğlubiyyətdən sonra 1-ci yerdən 5-ə düşdü.

“Talyeres de Kordoba” da öz meydanında uğursuz nəticə göstərdi. “Veles Sarsfild”ə 1:2 hesablı məğlubiyyət kordobalıları 2-ci yerdən 4-ə saldı.
Amma ilk 5 oyunda 12 xal qazanan digər iki komanda turu xalla başa vurdu. “Defensa y Xustisiya” çətin səfərdə qənaətbəxş nəticə göstərdi. Son çempion “Boka Xuniors”la oyun qarşılıqlı hücumlar şəraitində keçdi. Ev sahibləri topa nəzarət üzrə 59 faizlik üstünlüyə malik olsalar da, qonaqlardan qapıya dəqiq zərbələrin hesabında geri qaldılar (4:8). “Boka”nın qapıçısı 8 seyvlə ən yaxşı oyunçu adına layiq idi. Beləliklə, Uqo İbarranın komandası evdə iki xal itirdi. “Göy-sarılar” cədvəldə birpilləlik geriləmə ilə 7-ci yerə düşdülər. “Defensa y Xustisiya” isə topların daha yaxşı fərqinə əsasən 1-ci yerə çıxdı.

Turu “San Lorenso” üçün də qənaətbəxş saymaq olar. Paytaxt klubu liderlər qrupunda olan “Atletiko Urakan”dan səfər matçında bir xal almağı bacardı. 1:1 hesablı heç-heçə “San Lorenso”nun 13 xalla “Defensa y Xustisiya” ilə şərikli liderliyinə şərait yaratdı. 3-cü yerə yüksələn “Atletiko Urakan”ın bu mövsüm uduzmayan yeganə komanda olduğunu da qeyd edək.

“Rasinq”in qeyri-sabit çıxışı davam edir. Son mövsümün vitse-çempionu yeni mövsümün ilk üç turunda hesabına yalnız 2 xal yazmış, sonrakı iki matçda maksimum nəticə göstərmişdi. Fernando Qaqonun komandası yenidən azarkeşlərini məyus etdi. “Qodoy Krus”dan səfərdə iki cavabsız top buraxan avelyanedalılar 9-cu yerdən 16-ya yuvarlandılar.