FİFA “Köln”ə sanksiya verib.

"Football-plus.az" xəbər verir ki, Almaniya klubuna növbəti iki “transfer pəncərəsi” dövründə yeni oyunçuların qeydiyyatı qadağan edilib.

“Kicker” nəşrinin məlumatına görə, cəzaya ötən il sloveniyalı hücumçu Yaka Kuberin “Köln”ə keçidinin rəsmiləşdirilməsi zamanı qaydaların pozulması səbəb olub. Ehtimal olunur ki, bundesliqa təmsilçisinin rəhbərliyi həmin vaxt 16 yaşlı futbolçunu azad agent kimi transfer etmək və Sloveniya klubuna təzminat ödəməmək üçün onu “Olimpiya” (Lyublyana) ilə müqaviləni pozmağa təhrik edib. Kuber dərhal 4 ay müddətinə futboldan uzaqlaşdırılıb, “Köln” isə “Olimpiya”ya 54 min avro cərimə ödəməlidi.

Almaniya klubu FİFA-nın qərarından 21 gün ərzində İdman Arbitraj Məhkəməsinə şikayət edə bilər. “Köln”ün mümkün apellyasiya şikayəti təmin olunmazsa, klub yalnız gənclərdən və yeniyetmələrdən ibarət komandalarının oyunçularını qeydiyyatdan keçirə və ya hazırkı heyətdə olan futbolçuların müqavilələrini yeniləyə biləcək.