Premyer-liqanın 2021/22 mövsümünü 5-ci pillədə bitirən “Sabah” transfer bazarında xüsusilə fəaldı.

Aleksey İsayev, Boyan Letiç və Elvin Camalovla müqaviləni yeniləyən “bayquşlar” “Sumqayıt”dan Tellur Mütəllimovu transfer edib.

Paytaxt təmsilçisi bundan əlavə, əsas forvardı Xulio Sezar Rodrigesi, müdafiəçi Slavik Alxasovu, qolkiper Səlahət Ağayevi yola salıb.

“Tələbələr” növbəti mövsüm üçün daha iddialı komanda formalaşdırmaq niyyətindədi. Bu üzdən Murad Musayev Rusiya bazarında futbolçu axtarışına başlayıb. Bununla bağlı redaksiyamıza maraqlı informasiya daxil olub. “Bayquşlar”a Rusiya premyer-liqasının bombardiri Həmid Ağalarov təklif olunub. Ötən mövsüm UFA-nın heyətində 33 matçda 20 qol vurub, 2 məhsuldar ötürmə edən 21 yaşlı forvard komandanı tərk etmək istəyir. Buna səbəb Başqırdıstan təmsilçisinin premyer-liqanı tərk etməsidi. Ağalarovun klubla 2024-cü ilə qədər müqaviləsi var. “Sabah” istedadlı forvardı icarə əsasında transfer etmək niyyətindədi.

Qeyd edək ki, bir müddət öncə Həmid Ağalarovun adı Azərbaycan millisi ilə birgə hallanırdı. Lakin futbolçu mediaya açıqlamasında ölkəmizlə bağlılığının olmadığını dilə gətirmişdi.

İLKİN SULTANLI