Təxminən biraylıq fasilədən sonra ölkə futboluna könül verənlər premyer-liqa həyəcanı yaşadı.

Football-plus.az xəbər verir ki, dekabrın 25-də fasiləyə yollanan elita təmsilçiləri 2023-cü ildə ilk rəsmi oyunlarını keçirdilər. Adətən, toplanışdan dönən komandaların ilk turlarda “ağır” olduğuna, qarşılaşmaların aşağı tempdə keçdiyinə şahidlik etmişik. Məhz bu səbəbdən oyunlarda məhsuldarlıq da aşağı olur. Ancaq 2023-cü ildə baş tutan ilk turda azarkeşlər bolqollu oyunlar izlədi. Təsadüfi deyil ki, 19-cü oyun həftəsində mövsümün rekordu təkrarlandı. 2-ci və 7-ci turlarda olduğu kimi, bu dəfə də qapılara 18 qol vuruldu ki, bu da ortalama hər oyuna 3,6 qol deməkdi. Daha yüksək məhsuldarlıq son dəfə ötən mövsümün 10-cu turunda qeydə alınıb. 2021-ci il noyabrın 6-7-də keçirilən turun 4 matçında 17 qol vurulub və orta göstərici 4,25-ə bərabər olub.

Turun açılış matçında “Kəpəz” “doğma divarlar” arasında qələbəyə yaxın olsa da, sonda 1 xala sevindi. Tərlan Əhmədovun çalışdırdığı komanda ilk yarını iki top fərqi ilə irəlidə tamamladı. Amma fasilədən sonra ssenari dəyişdi. Toparlanmağı bacaran “qırmızı-qaralar” “status-kvo”nu bərpa eti. Gəncəlilərin 3 xal qazana bilməməsi təcrübəsizliyin adını yazılmalıdısa, qonaqların səfərdən 1 xalla dönməsini ilk yarını boşa verməsiylə əlaqələndirmək lazımdı.
Turun ən çox azarkeş toplayan matçı isə Tovuzda keçirildi. Lider “Qarabağ” “Turan Tovuz”un qonağı oldu. Günəşli, eyni zamanda şaxtalı havada baş tutan oyunda meydan sahiblərinin sürpriz etməsinə bir neçə dəqiqə çatmadı. Ayxan Abbasovun çalışdırdığı komanda adlı-sanli rəqibdən çəkinməyərək sona qədər mübarizə apardı. Əzmkar və istəkli oyuna görə “boz qurdlar”ın ünvanına xoş sözlər söyləmək mümkündü. Ancaq heç kimə baxımlı və parlaq oyuna görə 3 xal vermirlər. Əsas nəticədi ki, “köhlən atlar” ilin ilk qarşılaşmasında bunu, çətinliklə olsa da, əldə edə bildi.

Qış fasiləsində heyətinə yetərincə əl gəzdirən “Sumqayıt”ın “Zirə” ilə görüşdə necə təsir bağışlayacağı maraqla gözlənilirdi. Bəlkə də mövsümün ilk yarısı ilə müqayisədə “kimyaçılar”ın oyun planında dəyişiklik var idi. Komanda daha məzmunlu oyun nümayiş etdirdi. Ancaq meydan sahibləri Samir Abasovu və komandasını evə məyus yola salmağı bacardı. Rəşad Sadıqovun “qartallar”ı hesabda geri düşmələrinə baxmayaraq, xarakter nümayiş etdirərək 90 dəqiqənin tamamında hesabına 3 xal yazdırdı. Gəncədə “Qəbələ”nin heç-heçə etməsi Bakıətrafı qəsəbə təmsilçisinin işinə yaradı. “Sumqayıt” üzərində qələbə sayəsində “qartallar” “qırmızı-qaralar”dan bir qədər də uzaqlaşdı. Artıq “Zirə” ilə bölgə təmsilçisini 5 xal ayırır.

Ötən ilin sonunda, daha dəqiqi, 18-ci turdan sonra Mahmud Qurbanovun əvəzinə baş məşqçi postuna dəvət olunan Şahin Diniyev də, deyəsən, “Səbail”in dərdinə dərman tapa bilməyib. “Dənizçilər” “Şamaxı” ilə qarşılaşmada ilk yarıda hesabı açsa da, 90 dəqiqənin tamamında meydanı məyus tərk etdi. 19 turda 13-cü yenilgisini alan komandanın sonuncu pillədə “lövbər salması” heç də təəccüblü görünməməlidi.

Turun maraqla gözlənilən matçı Masazırdakı “Bank Respublika Arena”da baş tutdu. İkinci yerdə qərarlaşan “Sabah” özündən bir pillə aşağıda olan “Neftçi”ni qonaq edirdi. Bu komandalar arasında keçirilən əvvəlki iki qarşılaşma “bayquşlar”ın qələbəsiylə yekunlaşdığından düşünmək olardı ki, “ağ-qaralar” meydana qisas hissi ilə çıxacaq. Ancaq srağagünkü matç bir daha “Neftçi”nin cari mövsümdə “Sabah”a “əlcək atacaq” gücdə olmadığını göstərdi. Oyun meydan sahiblərinin böyük üstünlüyü şəraitində keçdi ki, bu da hesabda əksini tapdı. Fasilə ərəfəsində “ağ-qaralar” tələbələr”dən 5 xal geri qalırdısa, srağagünkü oyundan sonra fərq 8-ə yüksəldi. Belə məzmunsuz oyunla “Neftçi”nin nəinki “Sabah”ı haqlayacağı, 3-cü pillədəki yerini qoruyacağı da çətin görünür.

19 turdan sonra turnir cədvəlindəki yerlərinə görə komandaları iki hissəyə bölmək olar: birinci və ikinci “beşlik”. Qarşıdakı turlarda ilk “beşlik”də yer alanlar avrokuboklara vəsiqə uğrunda mübarizə aparacaqsa, 6-10-cu pillələrdə qərarlaşanlar elitada yerini qorumağa çalışacaq. Onu da qeyd edək ki, ikinci “beşlik”dəki komandalar arasında xal fərqi o qədər də çox deyil. 10 xalla sonuncu olan “Səbail” 19 turdan sonra 6-cı yerdə qərarlaşan “Turan Tovuz”dan cəmi 7 xal geri qalır.

Bombardirlik yarışında da qızğın mübarizəyə şahidlik edirik. İlk iki pillədə “Qarabağ”ın futbolçuları - Ramil Şeydayevlə Musa Qurbanlı qərarlaşıb. Adı çəkilənlər 2023-cü ilin ilk rəsmi oyununda da fərqləndi.

1. Qarabağ 19 17 2 0 51-10 53
2. Sabah 19 14 4 1 42-13 46
3. Neftçi 19 12 2 5 35-21 38
4. Zirə 19 9 4 6 23-25 31
5. Qəbələ 19 7 5 7 22-20 26
6. Turan Tovuz 19 4 5 10 13-25 17
7. Şamaxı 19 3 7 9 16-29 16
8. Kəpəz 19 2 7 10 18-37 13
9. Sumqayıt 19 2 6 11 11-33 12
10. Səbail 19 2 4 13 14-32 10

Bombardirlər: Ramil Şeydayev (Qarabağ) – 15, Musa Qurbanlı (Qarabağ) – 13, Emin Mahmudov (Neftçi), Coy-Lens Mikels (Sabah) – 10, Aleksey Kaşuk (Sabah) – 9.

RƏŞAD[hide][/hide]
Növbəti turun oyunları: 30 yanvar – Sumqayıt – Turan Tovuz; 31 yanvar – Qarabağ – Şamaxı, Səbail – Kəpəz; 1 fevral – Qəbələ - Sabah, Neftçi – Zirə.