Premyer-liqanın 3-cü dövrəsi başa çatdı.

Etiraf etmək lazımdı ki, son 9 tur olduqca maraqlı və gərgin keçdi. Ancaq qış fasiləsindən sonra qeydə alınan nəticələri nəzərə alsaq, turnir cədvəli aşağıdakı kimi olardı:

1 2 3 4
Qarabağ 6 3 0 21
Sabah 6 1 2 19
Neftçi 5 3 1 18
Turan Tovuz 3 2 4 11
Qəbələ 2 5 2 11
Kəpəz 2 4 3 10
Sumqayıt 3 0 6 9
Zirə 2 3 4 9
Səbail 2 2 5 8
Şamaxı 2 1 6 7
1 – qələbə, 2 – heç-heçə, 3 – məğlubiyyət, 4 - xal

Nəticələrə baxarkən Ayxan Abbasovun rəhbərlik etdiyi “Turan Tovuz”un “Qəbələ” və “Zirə”ni qabaqlaması diqqəti çəkir. Ümumiyyətlə, bu komanda sponsor tapandan sonra nəticələri yaxşılaşıb. Martın 31-də isə 4-cü dövrəyə start veriləcək. Son 9 turdan sonra turnir cədvəli tam şəkillənəcək. Amma faktiki ilk “3-lük” böyük ölçüdə bəllidi. Sadəcə, “Neftçi” qarşıdakı dövrədə 6 xallıq fərqi aradan qaldıra bilər. 4-cü pillədə qərarlaşan “Zirə”nin və ya 5-ci “Qəbələ”nin 9 tur ərzində “ağ-qaralar”ı keçməsi real görünmür.

Sözsüz, əsas mübarizə Konfrans Liqasına son vəsiqə və premyer-liqada yerini qorumaq uğrunda gedəcək. “Zirə” ilə “Qəbələ”nin duelində konkret üstün tərəf yoxdu. Sadəcə, “qırmızı-qaralar” ölkə kubokunu qazansa, bu mübarizə haqda danışmağa lüzum qalmayacaq. İstənilən halda, son pillərdəki komandaların performansı bu yarışa da xüsusi təsir edəcək. Yuxarıda qeyd etdiyimiz kimi, son illərin ən gərgin premyer-liqasını izləyirik. Çünki bu mövsüm bir kollektiv çempionatı tərk edəcək. 4 komandadan biri gələn mövsüm divizionda çıxış edə bilər. Söhbət “Kəpəz”, “Sumqayıt”, “Şamaxı” və “Səbail”dən gedir. Heyət baxımından ən zəif kollektiv “şirlər”di. Şamaxı təmsilçisi ancaq yerli futbolçulardan formalaşıb. Qalan 3 komandanın heyətində isə güclü legionerlər var. Bu amil premyer-liqanın sonuncusunu bəlli edə bilər. Lakin Vüqar Əsgərli ilə Cavid Hüseynovun birgə rəhbərlik etdiyi komanda əzmkarlıqda başqalarından geri qalmır.

Bəs sonuncu kim olacaq? Bunun cavabını tapmaq üçün 3 məqama diqqət yetirməliyik: komandanın gücü, son 9 turun qrafiki və ev oyunlarının sayı. Birinci məsələyə aydınlıq gətirdik. İndi də 9 turun qrafikinə nəzər yetirək:

“Kəpəz”
“Səbail” (e) “Qarabağ” (s), “Turan Tovuz” (e), “Şamaxı” (s), “Sumqayıt” (e), “Sabah” (e), “Zirə” (s), “Neftçi” (e), “Qəbələ” (s)
“Sumqayıt”
“Turan Tovuz” (s), “Neftçi” (e), “Şamaxı” (s), “Qəbələ” (e), “Kəpəz” (s), “Səbail” (e), “Sabah” (e), “Qarabağ” (s), “Zirə” (e)
“Şamaxı”
“Qarabağ” (e), “Turan Tovuz” (s), “Sumqayıt” (e), “Kəpəz” (e), “Sabah” (s), “Zirə” (e), “Neftçi” (s), “Qəbələ” (e), “Səbail” (s)
“Səbail”
“Kəpəz” (s), “Sabah” (e), “Zirə” (s), “Neftçi” (e), “Qəbələ” (s), “Sumqayıt” (s), “Qarabağ” (e), “Turan Tovuz” (s), “Şamaxı” (e)

“Şamaxı” 4-cü dövrəyə çətin rəqiblə başlayır. “Şirlər”in ağdamlıları məğlub etməsi sensasiya sayılacaq. Hətta “Şamaxı”nın “köhlən atlar”dan 1 xal alması belə qızıla bərabər olacaq. “Sumqayıt” da səfərdə “Turan Tovuz”u məğlub etmək potensialındadı. “Kəpəz”lə “Səbail” isə Gəncədə üz-üzə gələcək. Burda üstünlük meydan sahiblərindədi. Çünki “sarı-göylər” doğma şəhərdə hələm-hələm məğlub olmur. Ümumiyyətlə, bu görüşdə qalib gələcək komanda premyer-liqada qalmaq baxımından böyük iş görmüş olacaq. “Kəpəz” qələbə qazansa, demək olar ki, 60 faiz bu işin öhdəsindən gələcək.
Dövrənin ikinci turunda isə 4 kollektivdən üçü güclü rəqiblərlə üz-üzə gələcək. Yalnız “Şamaxı” doğma meydanda “Turan Tovuz”u qəbul edəcək. “Şirlər”in rəqiblərinin büdrəyəcəyini ehtimal etsək, Vüqar Əsgərlinin rəhbərlik etdiyi kollektivin tovuzluları məğlub etməsi şərt olacaq. Bu alınmasa, şamaxılılar üçün vəziyyət daha da qəlizləşəcək.

Premyer-liqanın 30-cu turu bir çox məsələlərə aydınlıq gətirə bilər. Məsələn, “Kəpəz” Qərb derbisində qələbə qazansa, işini daha da asanlaşdıracaq. Tovuzlular gəncəlilərin sevinməsinə asanlıqla imkan verməyəcək. “Şamaxı” isə əsas rəqiblərindən “Sumqayıt”ı məğlub etməlidi. Əks halda “şirlər”in işi çox çətinləşəcək. Heç-heçə isə hər iki komandanı təhlükəli mövqedə saxlayacaq. “Səbail”in avrokuboklar üçün can atan “Zirə”ni səfərdə məğlub etməsi o qədər də real deyil. 31-ci turda ölüm-dirim mübarizəsi Şamaxıda baş tutacaq. Bu görüş hər iki kollektiv üçün “davam, yoxsa tamam” matçı ola bilər. Burda qeydə alınacaq istənilən nəticə premyer-liqanın alt sıralarına təsir edəcək. “Səbail”in doğma meydanda “Neftçi”ni, “Sumqayıt”ın isə “Qəbələ”ni məğlub etməsi o qədər də asan olmayacaq. Bu görüşlərdə adı çəkilən kollektivlərdən birinin 1 və ya 3 xal alması işlərinin daha da qəlizləşməsinin qarşısını alacaq. 32-ci turda “Kəpəz”in premyer-liqada qalması rəsmiləşə bilər. “Sarı-göylər” “Sumqayıt”la matça kimi 4 oyunda 7 xal yığsa, “kimyaçılar”ı da məğlub etsə, növbəti mövsüm də Gəncə təmsilçisini elitada görəcəyimizi söyləyə bilərik. “Şamaxı”nın “Sabah”, “Səbail”in isə “Qəbələ” səfərinə yollanması gəncəlilər üçün daha bir üstünlük sayılacaq. 33-cü turdakı “Sumqayıt” – “Səbail” matçı da bir çox məqamı aydınlaşdıra bilər. Ən azı Samir Abasov – Şahin Diniyev duelini izləməyə, “dənizçilər”in 3-cü dövrədə son dəqiqədə vurulan qolun intiqamını alıb-almayacağına baxmağa dəyər. 34-cü turda 4 kollektivin hamısı həm heyət, həm də maddi baxımından özlərindən güclü rəqiblərlə qarşılaşacaq. Bu görüşlərdən birində hansısa kollektivin 1 xal alması belə qızıla bərabər olacaq. 35-ci tur da, demək olar ki, 34-cü tura bənzəyəcək. Sadəcə, “Səbail” səfərdə “Turan Tovuz”u məğlub edərək işini asanlaşdıra bilər. Lakin deyə bilərik ki, bu turda premyer-liqada qalacaq 4 klubdan ikisinin adı konkretləşə bilər.

Bütün məqamları və oyunları kənara qoysaq, premyer-liqanı tərk edəcək komandanın son turda bəlli olacağını söyləmək olar. Çünki 36-cı həftədə “Səbail” doğma meydanda “Şamaxı”nı sınağa çəkəcək. Bu görüş hər şeyi bəlli edə bilər.

İLKİN SULTANLI