Usik Füridən əlini üzdü, başqası ilə danışığa başladı
Qəzetimizin ötən sayında bütün qaydasız döyüş həvəskarlarını məyus edən xəbəri bölüşmüşdük.
"Football-plus.az" xəbər verir ki, söhbət WBA, IBF və WBO versiyaları üzrə superağır çəki dərəcəsinin çempionu Aleksandr Usiklə (20-0) WBC versiyası üzrə çempion Tayson Füri (33-0) arasında birləşdirici döyüşün təşkili ilə bağlı danışıqların uğursuzluğa düçar olmasından gedir. Birinci ağır çəkidə sabiq dünya çempionu Conni Nelsonun fikrincə, ukraynalı, sadəcə, britaniyalının az qala hər gün yenilənən tələblərindən cana doyub:
“Düşünürəm ki, Füri Usikə qalib gələ bilərdi. Ancaq hər şeydən belə görünür ki, Füri özü buna inanmır. Sanki döyüşdən imtina etmək üçün öz qiymətini qaldırdı. Axı o arzuladığı qonorar bölgüsünə - 70-in 30-a nisbətinə də nail olmuşdu. Danışıqlarda səbri daşıran son damlanın nə olduğunu bilmirəm, ancaq Füri istədiyi hər şeyi tələb edəndən sonra Usik deyib ki, “dünya yalnız sənin ətrafında fırlanmır, söhbət bitdi”. Hər şey məhz belə olub”.
Füri ilə birləşdirici döyüşün təşkilinə nail ola bilməyən Usikun nümayəndələri artıq titulu qorumaq haqqında düşnür. Ukraynalı titulunu Daniel Dyubua (19-1) ilə döyüşdə qorumalıdı. “Queensberry Promotions” şirkətinin rəhbəri Frenk Uorren həmkarımız Maykl Bensona açıqlamasında tərəflər arasında danışıqların artıq başladığını təsdiqləyib. Benson “tvitter” hesabında aşağıdakı informasiyanı yayıb: “Dyubuanın təmsilçiləri WBA-yə boksçunun artıq zədəsini sağaltması və dünya çempionu titulu uğruna mübarizəyə hazır olması ilə bağlı tibbi çıxarış göndəriblər”.
Digər xəbərlər
