WBA, IBF və WBO versiyaları üzrə superağır çəkidə çempion Aleksandr Usik (20-0) əmindi ki, WBC versiyası üzrə superağır çəkidə çempion Tayson Füri (33-0) obrazına nəzarət edir:

“Kameralar olmayanda o tam fərqli adama çevrilir. Kameralar önündə isə pis oğlan obrazını oynayır. Düşünürəm ki, sevgi haqda filmlər onun xoşuna gəlir, belə filmlərə baxanda bir qədər ağlayır. Bunda pis heç nə yoxdu. Mən də bəzi filmlərə baxanda göz yaşı axıdıram”.

Football-plus.az xəbər verir ki, birinci ağır çəkidə sabiq dünya çempionu Toni Belyu mümkün Usik – Füri döyüşü ilə bağlı proqnoz verib. Onun fikrincə, Usik Fürini məğlub edə biləsi yeganə döyüşçüdü:

“Həmişə düşünürdüm ki, Füri hədsiz böyükdü, ancaq döyüş yaxınlaşdıqca Usikə tərəf dönürəm. Düşünürəm ki, Usik Füriyə qalib gəlməyə qadir olan yeganə adamdı. Füri “Sugar Hill” şirkəti ilə əməkdaşlıq etməyə başlayandan bəri üslubu ciddi dəyişikliyə uğrayıb.

Yeganə problem budu ki, Tayson belə qabaritlə daim Usikdən bir addım geridə olacaq. Usik ayaqla gözəl işləyir, fantastik səviyyədə. Anlayıram ki, Füri bu döyüşün favoritidi, ancaq onu döyə biləsi kimsə varsa, bu da Aleksandr Usikdi”.

Usiklə Füri arasında birləşdirici döyüşün yazda keçirilməsi gözlənilir. Xatırladaq ki, Usik son döyüşdə Entoni Coşuaya, Füri isə Derek Çisoraya qalib gəlib.