Superağır çəkidə sabiq mütləq dünya çempionu, 57 yaşlı Lennoks Lüis də WBA, IBF və WBO versiyaları üzrə superağır çəkinin çempionu Aleksandr Usiklə eyni çəkidə WBC çempionu Tayson Füri arasında keçirilməsi gözlənilən döyüşlə bağlı mülahizə yürüdən adamlar sırasına qoşulub.

Football-plus.az xəbər verir ki, Lennoks məhz ukraynalını favorit sayır:

“Düşünürəm ki, Füri özündən sonra irs qoymaq istəyirsə, Usiklə döyüşməlidi. Usik onu döyə bilər. Tayson Füri əsas üstünlüyünün sürət olmasına öyrəşib. Ağırçəkililərin əksəri ləngdi, Tayson isə belələrinə qarşı döyüşə bilir. Usik isə Taysonu məğlub etməyə qadirdi. O, 12 raund boyunca fəal olacaq. Taysonun nəfəsi çatmayacaq və bəlkə də Usik onu nokauta salacaq”.

Xatırladaq ki, Usiklə Füri arasında birləşdirici döyüşün yazda keçirilməsi gözlənilir. Ukraynalı son döyüşdə Entoni Coşuaya, britaniyalı isə Derek Çisoraya qalib gəlib.