"Füzuli" icarəyə stadion götürdü - AÇIQLAMA
Region Liqasında qrup oyunları başa çatıb. Öz qrupunda maksimum nəticə göstərən "Füzuli" yeni rekorda imza atıb. Komanda 10 oyunun hamısında qələbə qazanmaqla pley-offa yüksəlib.
"Füzuli"nin planları maraq doğurur. "Football-plus.az" saytı olaraq bunu aydınlaşdırmaq üçün komandanın baş məşqçisi Vasif İsmayılovla danışdıq:
"Qarşımıza qoyulan minimum məqsədə çatdıq. 10 oyunda 10 qələbə qazanmaq bizi sevindirir. Amma arxayınlaşmaq olmaz. Hazırlığı davam etdiririk. Əsas hədəf finalda oynamaqdı. Martın 23-də "Neftçi-2" ilə yoxlama oyunu keçirəcəyik. 28-də isə püşkatmadı. Rəqibin adına aydınlıq gələndən sonra daha bir yoxlama matçı keçirmək istəyirik. Alınmasa, rəqibimizlə qarşılaşmaya hazırlaşacağıq".
İsmayılov 1-ci divizionla bağlı hazırlıqlardan da söhbət açdı:
"Stadion problemi vardı, artıq onu da həll etdik. Bizə yaxın rayonlardan birinin stadionu ilə müqavilə bağladıq. Ev oyunlarını keçirmək problemimiz olmayacaq. Sadəcə, hələlik rayonun adını açıqlamaq istəmirəm. Divizonda çıxış etmək üçün digər məsələləri də həll etmişik. Təkcə iştirakımıza icazə verilməsi qalır".
ABDULLA İSMAYILOĞLU
