AFFA İcraiyyə Komitəsinin son iclasında növbəti mövsümdən əvəzedicilərin çempionatının ayrıca keçiriləcəyi barədə qərar qəbul olundu.

Daha bir dəyişiklik divizionla bağlıdı ki, 2023/24 “futbol ili”ndə aşağı dəstədə 10 komanda mübarizə aparacaq.

Hazırda Region Liqasında çıxış edən 4 kollektivin peşəkar status daşıyan liqaya gətiriləcəyi gözlənilir. İndi hamını bir sual düşündürür. Həvəskar liqanı peşəkar status daşıyan diviziona dəyişən komandalar hansılar olacaq? Assosiasiyanın baş katibi Sərxan Hacıyev martın 7-də keçirilən toplantıdan sonra təşkil olunan mətbuat konfransında açıq mətnlə təmsil etdiyi bölgədə çıxış etməyən, stadionu olmayan komandaların diviziona gətirilməyəcəyini qeyd etdi. Bu isə o deməkdi ki, “Füzuli” kimi komandaları aşağı dəstədə görməyəcəyik. Baxmayaraq ki, bölgə təmsilçisi bu gün Region Liqasında çempionluğa ən real namizədlərdən biridi. Sadəcə, stadion problemi səbəbindən Vasif İsmayılovun çalışdırdığı kollektiv ev oyunlarını paytaxtda keçirmək məcburiyyətindədi. Bu isə AFFA-nın prinsipləri ilə üst-üstə düşmür.

Görəsən, hansı 4 klub növbəti mövsüm peşəkar status alacaq? Bu məsələ ilə bağlı “Football-plus.az” saytı maraqlı məlumat əldə edib. Etibarlı mənbədən bizə ötürülən bilgiyə görə, 4 komandadan 3-nün adı artıq dəqiqləşib. Bunlar Yevlax “Karvan”ı, Lənkəranı təmsil edən “Xəzər Lənkəran 42” və “Ağsu-06” kollektivləridi. Yalnız bir komanda məlum deyil ki, bu yöndə müzakirələr davam edir. AFFA rəhbərliyi Şimal zonasının da divizionda təmsilçisnin olmasını istəyir. Lakin Region Liqasında iki komandası olan Qusarın stadion problemi yaşaması bölgə təmsilçilərinin diviziona yolunu bağlayır. Qubada isə arena olsa da, komanda yoxdu. Ancaq son günlər Quba “Şahdağ”ının fəaiyyətini yenidən bərpa etdiyi barədə xəbərlər yayılır. Ola bilsin, assosiasiyanın dəstəyi ilə məhz qubalılar divizonda çıxış etsin.

RƏŞAD