Region Liqasında pley-offa yüksələn ilk komanda “Füzuli” oldu. Bölgə təmsilçisi qrupda keçirdiyi 8 oyunda maksimum nəticəyə imza atıb.

"Football-plus.az" saytı olaraq “Füzuli”nin planları haqda klubun icraçı direktoru və baş məşqçisi Vasif İsmayılovla danışdıq. Ondan komandanın 1-ci divizionda çıxış etmək perspektivini soruşduq:

"İş adamlarıyla danışıqlarımız davam edir. Hazırda Füzuli şəhərini stadionunda əsaslı təmir işləri gedir. Ona görə də hələlik ev oyunlarımız "ASK Arena"da keçiririk. Bundan başqa, Füzuliyə qonşu rayonlardan birinin stadionu ilə 2024-cü ilə qədər müqaviləmiz var. 1-ci divizionda çıxışımıza icazə verilsə, ev oyunlarımızı orda keçirəcəyik. Adını açıqlamayacam, çünki AFFA orda təftiş aparacaq. Həmçinin Horadiz Olimpiya İdman Kompleksiylə də razılaşmamız var. Divizionda mübarizəyə qoşulsaq, komandamızın bazası ora olacaq. Qısası, 1-ci divizionda çıxış etməyimiz üçün kağız üzərində hər şey hazırdı, sənədləşmə işlərini həll etmişik. Sponsorlar da söz verib ki, komandanın 1-ci divizionda çıxışına icazə verilən kimi üzərimizə düşən öhdəlikləri yerinə yetirəcəyik".

ABDULLA İSMAYILOĞLU