Region Liqasında pley-offa yüksələn ilk komanda “Füzuli” oldu. Bölgə təmsilçisi qrupda keçirdiyi 8 oyunda maksimum nəticəyə imza atıb.

"Football-plus.az" saytı olaraq “Füzuli”nin çıxışı haqda klubun icraçı direktoru və baş məşqçisi Vasif İsmayılovla danışdıq. Onun söylədikləri belə oldu:

"Hər bir oyuna ciddi hazırlaşırıq. Heyətimizdə yetərincə təcrübəli futbolçuların olmasına rəğmən, bütün rəqiblərimizə hörmətlə yanaşırıq. Bütün qarşılaşmalara sonuncu matçımız kimi çıxırıq. Düşünürəm ki, uğurumuzun əsas sirri də budu. 2017/18 mövsümündə 7 oyuna 7 qələbə qazanmışdıq. İndi də ötən tur göstəricimizi bir qədər də yaxşılaşdıraraq 8-də 8 etdik. Qələbə seriyamızı 10-a çatdırmaq istəyirik. Heyətimizdə Ruslan Poladov, Ceyhun Cavadov, Tural Qürbətov və Məhəmməd Alıyev kimi premyer-liqa təcrübəsi olan oyunçular var. Poladovu xüsusi qeyd edərdim. 43 yaşı olmasına rəğmən, ikinci cavanlığını yaşayır. Meydanda hamıdan çox qaçan, vuruşan odu. Mən Ruslanı bütün komandaya nümunə çəkirəm. O, tək futbolçu kimi yox, xarakteri, təcrübəsi və savadıyla da komandaya dəstək verir. Qismət olsa, 1-ci diviziona yüksəlsək, Ruslan Poladov karyerasını oynayan baş məşqçi kimi "Füzuli"də davam etdirəcək".

ABDULLA İSMAYILOĞLU