Ağaoğlu prezidentliyə namizəd olmayacaq
“Trabzonspor”da Ahmet Ağaoğlunun yenidən prezidentliyə namizəd olacağı ilə bağlı yayılan şayiələr təsdiqini tapmayıb.
"Football-plus.az" xəbər verir ki, Ağaoğlu namizədliyini irəli sürməyəcəyini özü rəsmən açıqlayıb. Xatırladaq ki, 2018-dən bu vəzifəni icra edən 66 yaşlı Ağaoğlu cari mövsümdəki uğursuz nəticələr və klubun borclarının artması üzündən martın 3-də istefa vermişdi. Seçki martın 26-da keçiriləcək. Hələlik yeganə namizəd və əsas favorit Ərtuğrul Doğandı. Ağaoğlu yazılı açıqlamasında bunları qeyd edib:
“İstefa verdiyim andan etibarən davam etməyim üçün mənə telefonla zəng vuran və sosial şəbəkələrdə dəstək verən hər kəsə təşəkkürümü bildirirəm. Birlikdə çox böyük uğurlara imza atdıq və həmişə dediyim kimi mənim dönəmimdə qazanılan 4 titulda əsas pay sahibi fanatlardı. Vermiş olduğunuz dəstəyə görə bir daha təşəkkür edib üzülərək bildirmək istəyirəm ki, qarşıdakı seçkidə namizəd olmağım mümkün deyil. Bu qərarın anlayışla qarşılanacağına ümid edirəm. Vəzifədə olduğum müddətdə mənə verilən dəstəyi ömrümün sonuna qədər unutmayacam. Allah hər birinizdən razı olsun. Haqqınızı halal edin”.
Yeri gəlmişkən, son turda məhz elə “Trabzonspor”la oyunda erkən qırmızı vərəqə alaraq “Adana Dəmirspor”un 1:4 hesablı məğlubiyyətində böyük rol oynayan Yunes Belhanda ilə bağlı da xəbər var. Sosial şəbəkələrdə bu məsuzliyyətsiz davranışı və rəqibin sifətinə zərbə endirərək qırmızı vərəqə alması üzündən Adana klubunun rəhbərliyinin mərakeşlini əsas heyətdən kənarlaşdırması barədə xəbərlər yayılmışdı. Klubdan bu məsələ ilə bağlı rəsmi açıqlama verilib. Bəyanatda qeyd olunub ki, mövsümün qalan hissəsinin önəmi və “Adana Dəmirspor”un avrokuboklara vəsiqə qazanmaq hədəfinin olması nəzərə alınaraq Belhanda əsas heyətdən kənarlaşdırılmayıb. Amma 33 yaşlı futbolçuya klub tərəfindən 180 min avro cərimə kəsilib! Bundan başqa, Nizam-İntizam Komitəsinin Belhandaya ən azı 2 oyunluq cəza verəcəyi gözlənilir.
Digər xəbərlər
