İyunun 21-də Klublar Birliyinin (KB) yeni sədri müəyyənləşdi.

Qurumun Maslakda yerləşən ofisində baş tutan toplantıda yeni prezidentin adı məlum oldu. ''Fənərbaxça'' prezidenti Əli Koç yeganə namizəd kimi qatıldığı toplantıda səsvermə yolu ilə başqan seçildi. Burda ''Trabzonspor''u başqan Ahmet Ağaoğlu, ''Beşiktaş''ı başqan Ahmet Nur Çəbi, ''Qalatasaray''ı isə başqan köməkçisi Niyazi Yelkəncioğlu təmsil etdi. Eləcə də superliqanın digər klublarının başqanları iştirak etdi. Qeyd edək ki, KB 2000-ci ildə ''Gənclərbirliyi''nin mərhum prezidenti İlhan Cavcav tərəfindən elita klublarının haqqını müdafiə etmək üçün yaradılan bir qurumdu. Birliyin sonuncu prezidenti Ahmet Ağaoğlu idi. O, bu vəzifəyə ötən ilin iyulunda seçilmişdi. Ağaoğluna qədər isə birliyin sədri vəzifəsini bu şəxslər icra edib: İlhan Cavcav, Camal Aydın, Özhan Canaydın, Əziz Yıldırım, Yıldırım Dəmirörən, Xəlil Ünal, Göksəl Gümüşdağ, Dursun Özbək, Fikrət Orman, Mehmet Sepil, Ahmet Nur Çəbi. Göründüyü kimi Əli Koç Əziz Yıldırımdan sonra KB-nin sədri vəzifəsinə seçilən ikinci ''Fənərbaxça''lıdı. Yeni rəhbərliyin iki vitse-prezidenti də olmalıdı və onların adları daha sonra açıqlanacaq.

Əli Koç ilk açıqlamasında qurumun əvvəlki sədri Ahmet Ağaoğlunun çox çətin bir dönəmdə bu vəzifənin öhdəsindən yaxşı gəldiyini vurğulayaraq ona təşəkkürünü bildirib. O Türkiyə Futbol Federasiyasının yeni prezidenti Mehmet Büyükekşinin qısa müddət ərzində özünü yaxşı tərəfdən göstərdiyini bildirərək gələcək adına ümidli olduğunu da vurğulayıb. Koç bildirib ki, yayın gəliri məsələsi hazırda Türkiyə futbolunun ən yaralı yeridi və Anadolu klubları başda olmaqla hamı gözünü bu məsələyə dikib. Çünki nəhənglərin başqa gəlirləri olduğu halda, Anadolu klublarının gəlirlərinin 80 faizini məhz yayın haqqı təşkil edir. O, yeni federasiya ilə birlikdə tezliklə bu məsələnin həll olunacağına və təklif olunan məbləğin bir qədər də artacağına ümid etdiyini deyib.