Məlum olduğu kimi, iyunun 16-da Türkiyə Futbol Federasiyasında (TFF) növbədənkənar prezident seçkisi keçiriləcək.

Srağagün, yəni iyunun 9-u namizədliklərin irəli sürülməsi üçün son tarix idi. Son günə qədər yalnız bir rəsmi namizəd var idi. Söhbət ''Qaziantep''in sabiq başqanı və iş adamı Mehmet Büyükekşidən gedir. Əvvəlcə belə güman olunurdu ki, iyunun 16-da birnamizədli seçki olacaq və Büyükekşi rahat şəkildə qələbə qazanacaq. Amma son gündə maraqlı hadisələr yaşandı. Qeyd olunan vaxtın tamamlanmasına bir saat qalmış ''Pazarspor''un sabiq prezidenti, hazırda isə bu klubun fəxri prezidenti olan Hasan Yanğın da namizədliyini irəli sürdü. Dünən isə TFF-nın rəsmi saytında sürpriz məlumat yerləşdirildi.

Xəbərdə qeyd olundu ki, sən demə prezidentlik üçün ümumilikdə 9 nəfər namizədliyini irəli sürüb! Büyükekşi ilə Yanğından başqa iş adamı Ramazan Ataş, ''Tokatspor''un prezidenti Ufuk Akçekaya, sabiq hakim Gökhan Kızıltan, Türkiyə Futbol Komisarları Dərnəyinin baş direktoru Sedat Olqa, psixologiya üzrə mütəxəssis Həyati Özgül, sabiq atlet Ayhan Sağaltıcı və iş adamı Camal Tarancı da namizədliyini irəli sürüb. Ən böyük sürpriz uzun illərdi federasiyada çalışan, eləcə də UEFA-nın idarə heyətinin üzvü olan və Nihat Özdəmirin istefasından sonra apreldən bəri müvəqqəti TFF-nin prezidenti vəzifəsini icra edən Sərvət Yardımcının namizədliyini irəli sürməməsi oldu. Əvvəlcədən belə güman olunurdu ki, seçkidə əsas mübarizə Büyükekşi ilə Yardımcı arasında gedəcək. Yardımcının geri çəkilməsindən sonra Büyükekşi aşkar favoritə çevrildi. Baxmayaraq ki, superliqanın üç nəhəng klubu - ''Beşiktaş'', ''Trabzonspor'' və ''Fənərbaxça'' onu dəstəkləmir! Büyükekşinin öz siyahısına önəmli futbol adamlarını, bir sabiq FİFA hakimini və Klublar Birliyinin sabiq prezidentini salaraq güclü bir idarə heyəti formalaşdıracağı gözlənilir. TFF-nin ümumilikdə 307 rəsmi üzvü var. Seçkidə qalib gəlmək istəyən şəxs səslərin 50 faizini, yəni ən azı 155 səs toplamalıdı. Onu da bildirək ki, budəfəki seçki növbədənkənar keçirildiyindən qalib gələn şəxs yalnız birillik müddət üçün prezident seçiləcək. Gələn il, yəni 2023-ün iyununda daha bir seçki baş tutacaq və onun qalibi artıq bu vəzifəni ən azı 4 il icra edəcək.