Son çempion statusunda olmasına rəğmən, uğursuz bir mövsümn keçirən “Trabzonspor”da fanatların qorxduğu oldu.

"Football-plus.az" xəbər verir ki, hər şey ya məşqçilər korpusunun, ya da rəhbərliyin istefasına doğru gedirdi. Son iki ildə çempion komandaların baş məşqçiləri (Okan Buruk və Sərgən Yalçın) istefa vermişdisə, bu dəfə rəhbərlik istefa vermək məcburiyyətində qaldı. Yəni “Trabzonspor”da Ahmet Ağaoğlunun prezidentlik dönəmi dünəndən etibarən rəsmən başa çatmış oldu.

Əslində bu istefada ən azı uğursuz nəticələr qədər klubun borcları da böyük rol oynadı. İdarə heyətinin toplantısında məlum oldu ki, Trabzon təmsilçisi bu ayın sonuna qədər 12 milyon avro ödəməlidi. Təbii ki, rəhbərlik ötənilki tarixi çempionluqdan sonra Çempionlar Liqasını düşünərək 41 milyon avroluq maaş büdcəsi olan bir heyət qurmuşdu. Amma komandanın əvvəlcə ÇL-də, sonra AL-də, ən sonda da KL-də mübarizəni dayandıraraq Avropa ilə vidalaşması gəlirlərin azalmasına səbəb oldu. Oyunçuların maaşları isə zatən 3 ay geridən ödənilir. Yəni arada 3 aylıq gecikmə olub. Bu ayın sonuna qədər maaşlar, bonuslar və tranfer məbləğlərinin müəyyən hissələrini üst-üstə gəldikdə ortaya 12 milyon avroluq bir borc çıxır. Yönəticilər, xüsusilə də vitse-prezident Ərtuğrul Doğan bu boyda borcun yığılmasına görə Ahmet Ağaoğluna narazılıqlarını bildirdilər. Doğan Ağaoğluna növbədənkənar seçkiyə getməyi təklif etdi. Ağaoğlu bunun üçün 9 imza toplamağı tələb etdi. Klubun daxili qanunlarına görə idarə heyətində ən azı 9 imza toplandığı anda maksimum 1 ay ərzində növbədənkənar prezident seçkisi keçirilməlidi. Ağaoğlu hadisələrin belə axarından sonra qarşıdakı seçkidə namizəd olmamaq şərti ilə istefa vermək qərarına gəldi! Dünən klubun saytında rəsmi qərar açıqlandı. Martın 18-19-da, yetərsay olmadıqda isə martın 25-26-da prezident seçkisi baş tutacaq. Yəni namizədlərin çox az vaxtı olacaq. Onlar maksimum 14 gün ərzində namizədliklərini irəli sürməli və 22 nəfərlik idarə heyəti hazırlamalıdılar. Birinci namizədliyini məhz Ərtuğrul Doğanın açıqlayacağı gözlənilir. Yerli mənbələrin yazdığına inansaq, o, çoxdan bəri gizli şəkildə seçkiyə hazırlaşırmış. Seçkidə klubun 9280 üzvünün səs vermək hüququ olacaq.

Beləliklə, 2018-ci ilin aprelində baş tutan seçkidə qalib gələrək Muharrem Ustanın yerinə gələn və klub tarixinin 17-ci prezidenti olan Ağaoğlunun 5 illik dönəmi başa çatdı. Həmin tarixdən bu yana o, daha iki seçkidə qalib gəlmişdi. Ağaoğlu 5 ildə 5 məşqçi ilə - Ünal Karaman, Hüseyin Çimşir, Eddi Nyuton, İhsan Təkəlioğlu və Abdulla Avcıyla çalışdı. Ötən mövsüm 38 illik çempionluq həsrətinə son qoyulduğu üçün Ağaoğlunun dönəmi daim müsbət mənada xatırlanacaq. Çempionluqdan başqa “Trabzonspor” onun dönəmində 1 dəfə ölkə kubokunu və 2 dəfə ölkə superkubokunu qazanmaqla 4 titul əldə etdi. Bundan başqa, Ağaoğlunun dönəmi həm də uğurlu transfer siyasəti ilə yadda qaldı. Yusuf Yazıcının satışından 17,5 milyon avro, Ahmetcan Kaplanın satışından 9,5 milyon avro əldə olundu. Aleksander Sörlotun sonrakı satışından 11 milyon avroluq pay gəldi. Qısası, bu müddət ərzində “bordo-mavililər” transferlərə 53,1 milyon avro xərclədiyi halda oyunçu satışından 67,4 milyon avro gəlir əldə etdilər.