9 ildən sonra premyer-liqaya dönən “Turan Tovuz” cari mövsümdə heç də pis təsir bağışlamır.

Ayxan Abbasovun çalışdırdığı komanda hazırda turnir cədvəlinin 6-cı pilləsində qərarlaşmaqla yanaşı, ölkə kubokunun yarımfinalına yüksəlib ki, bu da pis göstərici sayılmır. Mövsümün əvvəlində Tovuz təmsilçisində müəyyən maliyyə çatışmazlığı yaşansa da, təxminən bir ay öncə “Huner Group”la əməkdaşlıq müqaviləsi bağlanandan sonra problemlər həllini tapmaqdadı. Belə ki, Futbolun İnkişaf Fondunun reallaşdırdığı “Turan100k” layihəsi və yeni sponsorun ayrıdğı vəsait hesabına artıq komandaya avtobus alınıb. Söylənilənlərə inansaq, yaxın günlərdə Tovuz şəhər stadionunda yeni tablo və işıqlandırma sistemi də quraşdırılacaq.

"Football-plus.az"olaraq məsələyə aydınlıq gətirmək üçün klubun prezidenti Oqtay Abdullayevlə əlaqə saxladıq. Oqtay bəy söylənilənləri təsdiqlədi:

“Tablo problemi həll olunmaq üzrədi. Artıq tablo alınıb. Böyük ehtimalla dördüncü dövrə üçün stadionda quraşdırılacaq. İşıqlandırma sisteminə gəlincə, cari mövsümdə bu problem çətin həll oluna. Dirəklərin alınması ilə bağlı danışıqlar gedir. Ancaq təkcə dirəklə bu problem həll olunmur. İşıqlandırmanı təmin etmək üçün stadionda əlavə transformator quraşdırlmalıdı. Bu isə vaxt aparan prosesdi. Bu məsələ yeni mövsümdə həll olunacaq”.

RƏŞAD