“Öncə meydanda sonadək mübarizə aparan futbolçularımıza özüm və qəlbi “Neftçi” ilə döyünən azarkeşlərin adından təşəkkür edirəm. Artıq durğunluq dövrü geridə qalıb və irəliləyiş başlayıb. İnamımız böyük idi. Həmkarlarımla birlikdə məşq proseslərini izləmişdim. Oyunöncəsi hesab təxminlərimiz də özünü doğrultdu. Düzdü, azarkeşlərin iştahı həmişə böyük olur. Meydanda tam istədiyimiz performansı görməsək də, “Neftçi”nin var gücü ilə döyüşdüyünü bilirik. İnsidentə gəlincə, bu haqda qaneedici nəticəyə gəlməmişəm. Matçdan öncə nəyinsə yolunda getmədiyindən şübhələnmişdik. Vacib məqamlardan biri polislər tərəfindən ciddi şəkildə dəfələrlə yoxlanılmağımız oldu. Üç addımdan bir 5 yerdə üstümüz axtarıldı. 1 saat 30 dəqiqə sonra tribunaya keçdik. Yaxşı ki, stadiona vaxtından tez gəlmişdik. Tribunada “Luka, Luka” deyə qışqıran gənc azarkeşlər var idi. “Neftçi”nin tərəfdarları olsalar da, Ağdam təmsilçisinin qapıçısına simpatiya bəsləyirdilər. Bu təbiidi. Çünki bütün Azərbaycan bir neçə gün öncə Belçikada “Gent”lə qarşılaşan “Qarabağ”a səmimi qəlbdən ümid bağlamışdı. Onlar dəfələrlə qapıçını səslədi. Təəssüf ki, Quqeşaşvili həmin şəxslərə, yumşaq dillə desək, ədəbsiz əl hərəkətləri etməyə başladı. Qapıçıya reaksiyaları sərt olsa da, onları sakitləşdirməyi bacardıq. Növbəti epizodda isə iplər qopdu. “Qarabağ”ın “Neftçi”nin qapısına qədər irəlilədiyi anda hakimlərin və bir çox azarkeşin diqqəti ora yönəlmişdi. Cəzasızlıq mühitindən qaynaqlanan cəsarətlə fürsətdən istifadə edən Quqeşaşvili azarkeşlərimizə tərəf gəldi və əl hərəkətlərini davam etdirdi. Beləliklə, azarkeşlərin səbri tükəndi və sözügedən hadisə baş verdi. Əməkdaşlarımız bayrağı qorumaq üçün dərhal hərəkətə keçdilər. Xüsusi qeyd etməliyəm ki, yoxlanışda bizimlə qərəzli davranan polis işçisi gənc azarkeşlərimizdən birini boğa-boğa tribunadan uzaqlaşdırmağa çalışırdı. Müdaxilədən sonra ara sakitləşdi. Sonda rəqib klubun rəsmilərinin meydandakı kənar əşyaların şəklini çəkdiyini gördüm. Çox maraqlıdı, onlar niyə Lukanın ədəbsiz hərəkətini lentə almadılar? Ümumiyyətlə, Suraxanıda keçirilən bir çox oyunda belə hallarla rastlaşmışıq. İndi də bizi qıcıqlandırmaq üçün atılan addımların şahidi olduq. Günahsız yerə döyülən, zədələnən üvlərimiz var. Daha sonra polis bölməsinə dəvət edildik. Gecəboyu bizi orda saxladılar. Belə halların baş verməsini qətiyyən istəməzdim. Dəfələrlə azarkeşləri sorğu-sual edib partlayıcı maddəni kimin meydana atdığını öyrənmək istədim. Heç kim məsuliyyəti üzərinə götürmədi. Hətta and içdilər ki, xəbərimiz yoxdu. Bəlkə də hər şey məhz azarkeşlərimizin gözdən salınması məqsədilə qurulan plandı”.