Dünən baş tutan "Qarabağ" - "Neftçi" qarşılaşmasıyla Misli premyer-liqasında 24-cü tura yekun vuruldu. Gərgin keçən oyunda qalib müəyyənləşmədi - 1:1.

Qarşılaşma ilə bağlı Yunis Hüseynovun fikrini öyrəndik. Təcrübəli mütəxəssis “Football-plus.az” saytına bunları söylədi:

"Qarabağ" avrokubok matçından sonra həm yorğun, həm də psixoloji cəhətdən gərgin idi. Bundan başqa, Ağdam təmsilçisinin heyətində itkilər də vardı. Oyundan öncə "Neftçi"nin qələbə şansını 60 faiz qiymətləndirirdim. Hava dumanlı olsa da, meydanda yaxşı mübarizə getdi. "Ağ-qaralar" ilk dəqiqələrdən rəqibdən çəkinmədiyini göstərdi, hətta qol da vurdu. Birinci hissəni "Neftçi"nin hesabına yazardım. Lakin fasilədən sonra "köhlən atlar" toparlanmağa başladı. Son 20 dəqiqədə isə Qurban Qurbanovun yetirmələri meydanda dominantlıq etdi və hesabı bərabərləşdirdi. Hava şəraitinin bir qədər yaxşı olmaması hardasa azarkeşlərin oyundan zövq almasına mane olurdu. Çünki dumana görə meydan görünmürdü. Könlümdən "Neftçi"nin qələbə qazanması keçirdi. Düşünürəm ki, maraqlı görüş alındı, hesab da oyuna görə oldu. Qarşıdakı matçlarda hər iki komandaya uğurlar arzu edirəm".

ABDULLA İSMAYILOĞLU