Yunis Hüseynov Moldovaya qarşı oyunda da eyni qüsuru görüb
Milli komandamız dünən yoldaşlıq görüşü çərçivəsində səfərdə Moldova ilə qarşılaşıb.
Oyun yığmamızın 2:1 hesablı qələbəsiylə başa çatıb. Matçla bağlı Yunis Hüseynovun fikrini öyrəndik. Təcrübəli mütəxəssis “Football-plus.az” saytına bunları söylədi:
"Həmişə nəticə yadda qalır, oyun isə unudulur. Millimiz Moldova ilə qarşılaşmada yaxşı çıxış etdi. İlk yarıda daha üstün oyunla seçildik və rəqibin qapısına 2 dəfə yol tapdıq. Fasilədən sonra isə meydan sahibləri üstünlüyə yiyələndi. Onların künc zərbələri daha təhlükəli alınırdı və nəticədə qol da vurdular. Standart zərbələrdən qol buraxmaq və başla yaxşı oynaya bilməmək problemi hələ də qalmaqdadı. Düşünürəm ki, baş məşqçi də bunu görüb aradan qaldırmağa çalışacaq. Heç bir futbolçunu fərqləndirməzdim. Çünki qələbəni kollektiv qazanır. Ona görə də bütün oyunçuları və millini təbrik edirəm. Komandaya Şimali Makedoniya ilə oyunda da uğurlar arzu edirəm".
ABDULLA İSMAYILOĞLU
