16-cı turun gərgin keçən qarşılaşmalarından biri də Qəbələdə baş tutdu.

Football-plus.az xəbər verir ki, bölgənin eyniadlı komandası ağır hava şəraitində keçən oyunda “Səbail”i üstələdi. Oyundan sonra meydan sahiblərinin kapitanı Asif Məmmədovla canlı izlədiyimiz 90 dəqiqə və başqa mövzularla bağlı danışdıq.

- "Səbail"lə oyun gərgin alındı. Təəssüratın maraqlıdı…
- Oyuna istədiyimiz kimi başlamadıq. Erkən qol buraxdıq. Buna rəğmən, ruhdan düşməyərək döyüşdük və qələbə qazandıq. 0:1 hesabıyla geridə olandan sonra dönüş edib 2:1 qalib gəlmək xüsusi ruh yüksəkliyi, sevinc deməkdi. Qələbəyə çox ehtiyacımız vardı.

- Havanın dumanlı olması mane olmadı?
- Kənarda vəziyyətin necə olduğunu deyə bilmərəm. Amma duman ilk 2-3 dəqiqə ərzində bizə mane oldu. Ondan sonra meydanda hər şeyi görürdük.

- Ötən turlarda 90 dəqiqə oynadın. Bu gün isə əvəzləndin. Öz oyunun haqda nə deyə bilərsən?
- Əvvəlki görüşlərdə özümü yaxşı hiss edirdim. Ağrılarım yoxdu, sadəcə, matçın gedişində bir qədər yoruldum və əvəzləndim. Bu da görünür, yaşla bağlıdı.

- Turun mərkəzi oyunu sayılan "Neftçi" - "Qarabağ" qarşıdurmasında ağdamlılar 4 cavabsız qolla qalib gəldi. Səncə, "köhlən atlar" qarşısıalınmazdı, yoxsa "ağ-qaralar" zəif çıxış etdi?
- "Qarabağ"ın gücü hamıya bəllidi, onlar haqda əlavə nəsə deməyə ehtiyac görmürəm. "Neftçi" ilk hissədə pis oynamadı, qol vurmaq üçün imkanları da oldu. Sadəcə, fürsətləri qaçırdılar. Düşünürəm ki, "ağ-qaralar" hesabı bərabərləşdirsəydi, fərqli oyun görəcəkdik. İkinci qoldan sonra ruhdan düşdülər. Nəticədə "köhlən atlar" qalib gəldi.

- Kubok oyunlarını da nəzərə alsaq, qarşıdan son çempionla ardıcıl 3 oyun gəlir. “Qəbələ”ni də "Neftçi"nin aqibətinin gözlədiyindən qorxmursuz?
- Təqvimin bu cür olması bizi məyus etdi. "Qarabağ" kimi güclü komanda ilə ardıcıl üç çətin oyuna çıxacağıq. Amma ruhdan düşmürük, maksimum gücümüzü qoyaraq öz oyunumuzu sərgiləyəcəyik.

- Davam etməkdə və sürprizlərlə zəngin olan dünya çempionatı haqda hansı fikirdəsən?
- Futbolu tanıyandan Braziliyaya azarkeşlik etmişəm. Odu ki, turnirdə favoritim "sambaçılar"dı.

ABDULLA İSMAYILOĞLU