"Möhtəşəm oyun oldu. Çox istərdim ki, belə derbi matçların sayı çox olsun. Bu həm futbolçularımızın, həm çempionatımızın, həm də millimizin inkişafı deməkdi. Hər iki komandanın önə keçmək üçün şansları oldu, sadəcə, fürsətləri qaçırdılar. "Qarabağ"da Avroliqa oyunlarının və 3 gün əvvəl səfərdə "Turan Tovuz"la matçın yorğunluğu hiss olunurdu. Buna rəğmən, Qurban Qurbanovun yetirmələri fasilədən sonra tempi artırdı, yüzfaizlik qol vəziyyətləri yaratdı. Sadəcə, son nöqtəni qoya bilmədilər. "Sabah" ötən mövsümün 2-ci dövrəsindən yaradıcı oyunu ilə diqqəti çəkir. Komanda daha da “artırıb”. Doğrudu, Ağdam təmsilçisini büdrətdilər, amma bu hələ hər şey demək deyil. Qarşıda uzun marafon var. Çox istərdik ki, "Sabah" kimi mübariz komandaların sayı çox olsun. Vaxtilə çıxış etdiyim "Neftçi" hazırda heç də uğurlu dönəm yaşamır, "ağ-qaralar"ı ən azı Masazır təmsilçisi kimi mübariz görmək istəyərdim. Ümid edirəm ki, "Neftçi" başda olmaqla qalan komandaların da ifasında mübarizəli, döyüşkən oyunlar görəcəyik. Hazırda "Sabah" sərgilədiyi oyuna görə ən azı ikinci yerə layiqdi. Çox istərdim ki, bu mövsüm çempionun adına son turda aydınlıq gəlsin, maraqlı və gərgin oyunlar izləyək".