"Bir komandanı yaratmaq, qurmaq, formalaşdırmaq və nəticə qazanmaq üçün illərlə vaxt lazımdı. Qurban Qurbanovun "Qarabağ"da istər ölkə, istərsə də qitəmiqyaslı yarışlarda uğurunun səbəbi nədi? Ona inandılar, vaxt verdilər. Buyurun, nəticələr də göz önündədi. Hazırda Azərbaycan futbolunu çiyinlərində daşıyan "Qarabağ"dı. Eynilə Rəşad Sadıqova da zaman tanınmalı, inanılmalıdı. "Zirə" qeyri-sabit oynayır, amma bu onların zəif çıxış etmələri anlamına gəlməməlidi. Komandada həm səviyyəli yerli futbolçular, həm də legionerlər var. Həmçinin Rəşad Sadıqovla uzun illər çiyin-çiyinə futbol oynamış biri kimi əminliklə deyə bilərəm ki, istər futbolçu, istər kapitan, istərsə də baş məşqçi kimi işində qətiyyətlidi. Onun rəhbərlik etdiyi komandada özbaşınalıq, intizamsızlıq ola bilməz. Diqqətlə oyunlara baxsaq, görərik ki, "qartallar" heç də pis oynamır. Hətta uduzduqları matçlarda belə yaradıcı oyunla diqqəti çəkirlər. Komanda sona qədər döyüşür. Bunu "Qarabağ"la son oyunda da gördük. Sadəcə, ani diqqətsizlik, bəxtsizlik mane olur. Hələ çempionatın sonuna xeyli var. İnanıram ki, Rəşad müəllim "Zirə"ni toparlayacaq və qəsəbə təmsilçisinin uğurları gələcək. Millinin sabiq kapitanına və komandasına uğurlar arzulayıram. Ortada nəticə, ciddi uğur olmadığı halda daim əcnəbi məşqçilərə hədsiz güvən, ehtiram göstərib, pullar töküb zaman verdiyimiz kimi, yerli məşqçilərə münasibətdə də eyni davranışı göstərməliyik. Futbolumuzun inkişafını istəyiriksə, yerli mütəxəssislərə şans verməliyik".